16 қар, 2023 сағат 14:12

«Отбасы» банкі 20 миллионыншы боп туған 5 балаға 2 млн теңгеден береді

Фото: ашық дереккөзден

«Отбасы» банкі еліміздің 20 миллионыншы тұрғыны атанған 5 балаға 2 млн теңгеден береді. Бұл туралы «Отбасы банкі» АҚ басқарма төрағасы Ләззат Ибрагимова айтты, деп хабарлайды Kazinform агенттігі.

«Отбасы банкі» еліміздің 20 млн-шы тұрғыны атанған балалардың болашағына өз үлесін қосқысы келеді. Біз оларға 2 млн теңге номиналды құны бар сыйлық сертификатын сыйлаймыз. Бұл сертификат – жай ғана сыйлық емес. Ол – жарқын болашаққа жолдама. Бұл қаражат жеке баспана сатып алудың алғашқы қадамы болады», - деді ол Орталық коммуникациялар қызметіндегі баспасөз мәслихатында.

Оның атап өтуінше, сертификатты қолдану үшін балалардың ата-аналар өздері тұрып жатқан қаладағы банк филиалына барып, жеке куәлігін, баланың туу туралы куәлігін көрсетуі керек. Сонымен қатар видеобанкинг арқылы да хабарласуға болады.

«Ол үшін ата-аналарға 3 ай уақыт беріледі», - деді Ләззат Ибрагимова.