01 нау, 2022 сағат 12:34

Нығматулин мен Әлсейітов Nur Otan партиясының саяси кеңесі құрамынан шығарылады

коллаж: Tengrinews.kz

Nur Otan партиясының жауапты хатшысы Асхат Оралов партияның саяси кеңесі құрамына ұсынылып отырған өзгерістер туралы айтты, - деп хабарлайды Tengrinews.kz агенттігі.

"Мына сұрақтар қарауға ұсынылады:

Оспанбек Әлсейітов пен Нұрлан Нығматулинді партияның Саяси кеңесі құрамынан шығару туралы;

оның құрамына партияның мына мүшелерін - премьер-министр Әлихан Смайыловты, Президент Әкімшілігінің басшысы Мұрат Нұртілеуовты, "Астана" медициналық университетінің ректоры Қамалжан Надыровты және "Қазақ тілі қоғамы" вице-президенті Максим Рожинді енгізу туралы", - деді Оралов партияның кезектен тыс съезінде сөйлеген сөзінде.

Съезд мүшелері ұсынысты қолдап дауыс берді.

Съезд онлайн форматта өтіп жатыр. Президент XXII съезді шақыру туралы шешімді 18 ақпанда қабылдаған болатын. Оған бүкіл аймақтан делегаттар қатысты.

Еске салайық, былтыр қарашада саяси кеңестің кеңейтілген отырысында Елбасы Нұрсұлтан Назарбаев Nur Otan партиясы төрағасының өкілеттігін беру туралы шешім шығарған еді. Ол партияны ел Президенті басқаруы тиіс екенін айтты. 28 қаңтарда Тоқаев Nur Otan партиясының төрағасы болып сайланды.

Ақпанда Президент партия жұмысын жаңғыртуды жеделдетуді тапсырды. Оның айтуынша, ел азаматтарының талап-тілектеріне толық жауап беруі үшін партияны жүйелі түрде қайта құру қажет. Сондай-ақ партия заманауи сын-қатерлерге төтеп беруге және жедел әрекет етуге тиіс.