Мысырда жоғалған қазақстандық студенттердің жүріс-тұрысынан жат дін белгілері байқалған емес. Бұл туралы БАҚ өкілдеріне ҚР Сыртқы істер министрлігі баспасөз қызметінің жетекшісі Әнуар Жайнақов мәлім етті, деп хабарлайды "Ұлт ақпарат".
«Біздегі мәліметтерге сәйкес, алты қазақстандық студент 20 шілдеден бастап жақындарымен байланысқа шықпаған. Олардың екеуі 11 шілде күні екі айлық тілдік курстан өту үшін Каирге келген. Барлығы бір пәтерде тұрған. 20 шілдеден бастап олармен байланыс үзілген. Сол сәттен бастап қазақстандық дипломаттар іздеу шараларына кірісіп кетті. Қазақстанның Елшілігі Мысырдың Сыртқы істер министрлігіне қазақстандық азаматтарды іздеуге және қай жерде екендіктерін анықтауға жәрдем берулерін өтініп нота жолдады. Қазіргі уақытта қазақстандықтарды іздеу жұмыстары жалғасуда. Менің білуімше, олар «Нил» деп аталатын оқу орнында білім алып жатқан. Елшілігіміздің дерегінше, олардың жүріс-тұрысынан дәстүрлі емес діни сенім белгілері байқалмаған», - деді Жайнақов.
Еске сала кетсек, Мысырда жоғалып кеткен Қанат Берікке Айбол Исабек есімді әлеуметтік желі қолданушы Facebook арқылы іздеу жариялаған болатын. Оның жазуынша, Қанат 11 шілде күні досы Еламан Жазылханмен Мысырға ұшып кеткен.
«Алматыдан Шардж қаласына ұшқан. Шардждан Александрияға. Барған сәтте ҚР елшілігіне тіркелген. 20 шілде күні екеуі де байланысқа шықпай қалды. Египеттегі Қазақстан Консулы Ершат олардың қайда екенін білмейді. Оларды іздестіруге баршаңыздан көмек сұраймын! Соңғы дерек бойынша, тағы 4 бала жоғалған. Жалпы саны 6 қазақстандық студент жоғалып кетті», - деп жазды ол.
4053 рет оқылды
