02 нау, 2022 сағат 13:57

Мәжіліс спикері: Украина мен Ресей - бізге бауырлас елдер

Мәжіліс төрағасы Ерлан Қошанов Украинадағы жағдай туралы айтты, - деп хабарлайды Tengrinews.kz.

Мәжіліс отырысынан кейін журналистер Қошановтан Қазақстан Украинаға қалай көмектесе алатынын сұрады.

"Украина мен Ресей - бізге бауырлас елдер. Сондықтан қанның төгілгенін, ғимараттар қирағанын көру өте ауыр. Қазақстан қандай көмек көрсете алады? Мемлекет басшысы айтқандай, біз екі тарап арасында делдал болып, келіссөздер алаңын ұйымдастыра аламыз", - деді Қошанов.

Сонымен қатар, Мәжіліс спикеріне Қазақстан Ресейге қарсы санкциялардың салдарын қалай азайтатыны туралы сұрақ қойылды.

"Түсінікті сұрақ. Жағдай күн сайын, сағат сайын өзгеріп отыр, сондықтан болжау қиын. Мемлекет басшысы Ұлттық банк пен Үкіметке Батыс санкцияларының (Ресейге - ред.) Қазақстан экономикасына әсерін барынша азайтуды тапсырды. Бұл тұрғыда елімізде барлық қажетті қадам жасалып жатыр", - деп қосты ол.