27 сәу, 2021 сағат 20:40

Мамин Маңғыстау облысына жұмыс сапары барысында бірқатар нысандарды аралады

ҚР Премьер-Министрі Асқар Мамин Маңғыстау облысына жұмыс сапары барысында АӨК, көлік, туризм салаларындағы инвестициялық жобалардың іске асырылуымен, сондай-ақ халықты вакциналау барысымен танысты.

Түпқараған ауданында Үкімет басшысы биыл сәуір айында пайдалануға берілген «Ақтау Агро» ЖШС құс фабрикасына барды, деп хабарлайды "Ұлт ақпарат" Үкіметтің баспасөз қыземтіне сілтеме жасап.

Кәсіпорынның қуаты жылына 5 мың тонна тауық етін құрайтын инкубатор цехы, өндірістік кешені және құс сою цехы бар. Құс фабрикасы Маңғыстау облысының ішкі нарығының құс етіне қажеттілігін 50% қамтамасыз етуге мүмкіндік береді. Өнімнің бірінші партиясын осы жылдың маусым айының соңында өңірдің сауда орындарына жеткізу жоспарлануда.

Инвестициялардың жалпы көлемі 5,7 млрд теңгені құрайды.

Кәсіпорында 90-нан астам тұрақты жұмыс орны ашылды. Мұнайлы ауданында Премьер-Министр 85 га аумақта салынып жатқан «Aktau Green House» ЖШС жылыжай кешенінің құрылыс жобасымен танысты. Жоба 2 кезеңде жүзеге асырылады. Бірінші кезеңде инвестиция көлемі 26 млрд теңгені құрайды. Биылғы желтоқсан айына қарай кәсіпорында 180-нен астам жұмыс орны құрылады, ал өндіріс көлемі жылына 8 мың тонна көкөністі құрайды. Екінші кезеңде – 2022 жылдың соңына қарай жұмыс орындарының саны 430-ға дейін, ал жылыжай кешенінің қуаты 13 мың тонна өнімге дейін ұлғайтылады.

Үкімет басшысы халықаралық әуежайдан Ақтау курорттық аймағына дейінгі жолды реконструкциялау, республикалық маңызы бар «Жетібай – Құрық» автомобиль жолын күрделі жөндеу барысын, сондай-ақ өңірдегі басқа да автожол жобаларының іске асырылуын тексерді.

А. Мамин Ақтау қаласының туристік инфрақұрылымының құрылыс алаңдарын — тақырыптық ойын-сауық паркін, гольф-клубын, апартаменттер мен жалпы саны 600-ден астам нөмірі бар Fairmont, Hilton, Aqualina Resort брендтерінің қонақ үйлерін аралады.

Үкімет басшысы жоспарланған нысандар құрылысының уақытылы әрі сапалы аяқталуын қамтамасыз етуді тапсырды.

Сондай-ақ жұмыс сапары аясында Премьер-Министр «Ясин» медициналық орталығында болып, өңір тұрғындарын коронавирус инфекциясына қарсы вакциналау барысымен танысты.