Фото: театрдың баспасөз қызметі
Ғ.Мүсірепов атындағы Қазақ мемлекеттік академиялық балалар мен жасөспірімдер театры жаңа маусымның тағы бір әсерлі премьерасымен қуантты. Наурыздың 7-8 күндері Барзу Абдураззаковтың «Сәлем, Мама, бұл мен!» пьесасының желісі бойынша сахналанатын «Мама» қойылымы көрерменге ұсынылды, деп хабарлайды Ult.kz.
Қойылымның режиссері – Фархад Молдағали, ал басты рөлдерде талантты актерлер Лидия Кәден, Күлжәмилә Белжанова, Қазбек Төлен және Елдар Отарбаев өнер көрсетеді.
Фото: театрдың баспасөз қызметі
«Мама» қойылымы отбасылық қарым-қатынас пен адамгершілік құндылықтарды көрерменге жаңа қырынан көрсетеді. Спектакль сюжеті қарт ана мен оның жұмысбасты ұлының телефон арқылы сөйлесулеріне негізделген. Қарапайым диалогтар арқылы ана мен бала арасындағы нәзік қарым-қатынас, мейірім мен сүйіспеншілік, уақыттың құндылығы шебер жеткізіледі. Әңгімелер «бос» сияқты көрінгенімен, олар әрбір адамның жүрегіне жақын мәңгілік тақырыптарды қозғайды.
Фото: театрдың баспасөз қызметі
Кейіпкер ұлының анасына деген қарым-қатынасы біртіндеп өзгере бастайды. Әрбір қоңырау – бұл жақын адамдардың бір-бірін түсінуге ұмтылысы мен махаббаттың шексіздігіне терең бойлау.
8 Наурыз - Халықаралық әйелдер күні мерекесіне орай қойылған жаңа қойылым әр адамды өз ата-анасы мен жақындарына назар аударуға, қамқорлық пен сүйіспеншілік көрсетуге тағы бір мәрте шақырып, отбасылық құндылықтарды еске салады.
957 рет оқылды
