Мəдениет жəне спорт вице-министрі Өркен Бисақаев жұмыс сапарымен Маңғыстау облысына келді, деп хабарлайды "Ұлт ақпарат".
Вице-министр жұмыс барысында өңірдегі туризм және экология саласының өкілдерімен қоғам белсенділерімен кездесті.
Өркен Бисақаев биыл шілде айынан бастап Маңғыстауға келіп демалушылардың саны артқанын атап өтті. Бұл өз кезегінде облыс туризмін дамытуға ден қою керегін аңғартатынын айтты.
«Бүгінде туристер арасында Rixos Water world қонақүйі бағытынан бөлек, Бозжыра шатқалы да танымал. Біздің статистикамыз бойынша қазір бұл жерге келушілер саны өткен жылмен салыстырғанда 10 есе артқан. Жобамен бұл жерге 2 мыңнан астам адам келген. Ал келесі жылы бұл көрсеткіш артып, кемі 10 мыңнан астам турист келіп, демалады деген болжам бар», деді вице-министр.
Айта кетейік, бұған дейін әлеуметтік желілерде Бозжыра шатқалында қонақ үй кешені жобасы жүзеге асырылады деген хабар тараған болатын. Алайда, облыс әкімдігі қазіргі таңда «Бозжыра сафари» қонақ үйінің жобалау жұмыстары жүргізіліп жатқанын хабарлағанын жазған болатынбыз.
Бұл жайға қатысты экологтар қарсылық білдіріп, құрылыс жұмыстары кезінде бұл жерге зиян келетінін айтты. Өркен Бисақаев аталған жайтқа қатысты түсініктеме беріп, алдымен экономика тұрғысынан қажеттілік пен экология арасындағы теңдікті сақтау маңызды екенін жеткізді.
«Шатқалды жан–жақты қарап шыққан мамандар бұл жерге адамдар мен көліктердің еш қиындықсыз келіп-кете алатынын айтып отыр. Яғни, жер рельефі ешқандай арнайы дайындықты керек етпейді.
Біздің ойымызша, ешбір ретсіз өз еркімен ағылып келетін саяхатшылар ерекше табиғи орынға зиянын тигізуі мүмкін. Бұл жерде зиян тау шатқалына емес, жазық далаға тиеді. Өйткені, жазықтағы топырақ көп көліктің бейберекет қозғалысынан шаңға айналып, кейбір жәндіктер мен өсімдіктерге кері әсер етеді. Туристер қозғалысын реттеп, туристер қабылдау үшін Бозжыра тауына жақын жерде туристік нысан мен қозғалысты реттейтін жүйе қажет», - деп түсіндірді Өркен Бисақаев қоғам өкілдеріне.
Сонымен қатар, вице-министр шатқал аумағында инфрақұрылымды ретке келтіріп, туристер қауіпсіздігі мен қолайлылығы үшін бірқатар шараны іске асыру керегін атап өтті.
«Бозжыра шатқалы маңындағы нысан құрылысы қоғам назарына ұсынылып, экология тұрғысынан сараптамадан өтіп, қоршаған ортаға əсері қандай болатынын анықтау керек. Дəл қазір қонақ үй құрылысы жоспарда жоқ. Сонымен қоса ешқандай жоба мақұлданып, бекітілген жоқ», - деді Өркен Бисақаев.
Бозжыра шатқалы Маңғыстау облысында жергілікті маңызы бар «Жабай Үшқан» қорығының аумағында орналасқан. «Жабай Үшқан» киелі орны Маңғыстау облысы әкімінің қаулысымен 2012 жылы құрылған. Қазір облыстағы «Қызылсай» мемлекеттік аймақтық табиғи паркінің құрамында. Қорық төлқұжатына сәйкес аумаққа туристердің кіруіне, туристерді қабылдайтын нысандар жұмысына рұқсат берілген.
807 рет оқылды
