Фото: ашық дереккөз
Қостанай облысында жол-көлік оқиғаларының саны айтарлықтай өсіп, оның салдарынан қаза тапқандардың арасында балалар да бар, деп хабарлайды Ult.kz облыстық прокуратураға сілтеме жасап.
Прокуратура дерегінше, 2025 жылдың қаңтар-тамыз айлары аралығында облыс жолдарында 854 апат тіркелген, бұл өткен жылдың сәйкес кезеңімен салыстырғанда 25,8%-ға артық (2024 ж. – 679 апат).
Апаттар салдарынан 1234 адам зардап шеккен:
-
1184 адам жарақат алды;
-
50 адам көз жұмды.
Қаза тапқандардың ішінде 6 кәмелетке толмаған бала бар. Бұл көрсеткіш өткен жылмен салыстырғанда 500%-ға артқан (2024 ж. – 1 бала).
Ең көп апат республикалық және халықаралық маңызы бар трассаларда болған. Атап айтқанда:
-
Қостанай – Рудный – Денисовка – Комсомольское – Қарабұтак (KAZ 19) жолында апаттар 114,3%-ға өскен;
-
Қостанай – Әулиекөл – Сурған (KAZ 23) жолында өсім 61,9%-ды құраған.
Прокуратураның мәліметінше, жол-көлік оқиғаларының басым бөлігі жүргізушілердің жол ережесін өрескел бұзуынан болған. Сонымен бірге апаттардың бір бөлігі жаяу жүргіншілер кінәсінен тіркелген.
Азамат Жақсыбаев, Құқықтық статистика комитетінің Қостанай облысы бойынша департаментінің аға прокуроры:
«Жүргізушілердің тәртіпсіздігі мен назарсыздығы салдарынан адамдар қаза тауып, жарақат алып жатыр. Сондықтан жол қозғалысы ережелерін қатаң сақтауға шақырамыз. Өзіңізді және жақындарыңызды қорғаңыздар», – деді.
Оқи отырыңыз: Соңғы апаттардан кейін ІІМ жолдағы тәртіпті күшейтеді.
