Фото: Bugin.kz
Қазақстанның еңбек сіңірген өнер қайраткері, Халық қаһарманы, дарынды композитор әрі дирижер Нұрғиса Тілендиевтің туғанына бүгін 100 жыл толды, деп хабарлайды Ult.kz.
Көрнекті күйші 1925 жылы 1 сәуірде Алматы облысы Іле өңірінде дүниеге келген.
Әр жылдары Абай атындағы Қазақ мемлекеттік академиялық опера және балет театрының жетекші дирижері, Қазақтың халық аспаптар оркестрінің бас жетекшісі, Қазақфильм студиясының музыка редакциясында бас редактор, ал 1981 жылдан бастап "Отырар сазы" фольклорлық-этнографиялық ансамблінің негізін қалаушы әрі көркемдік жетекшісі қызметтерін атқарды.
Ол Қ.Қожамияровпен бірлесе отырып "Алтын таулар" операсын, Л.Степановпен бірге "Достық жолымен" балетін, сондай-ақ "Ортеке" балет-поэмасын, "Менің Қазақстаным" кантатасын, оркестрге арналған "Поэма", "Ата толғауы", "Ақсақ құлан", "Аққу", "Арман", "Махамбет", "Көш керуен" шығармаларын және "Халық қуанышы", "Қайрат", "Жеңіс салтанаты" атты увертюраларды дүниеге әкелді. Ол 400-ге жуық ән мен романстың авторы.
Сонымен қатар, 50-ден аса драмалық қойылымға, 19 көркем фильмге, 17 анимациялық фильмге және 14 деректі-хроникалық кинотуындыға әуен жазған.
Өнер әлемінде өшпес із қалдырған қайраткер екі мәрте Еңбек Қызыл Ту орденімен марапатталған.
633 рет оқылды
