30 тамыз күні Қазақстанда 134 Covid өлімі тіркелді. Бұл туралы Денсаулық сақтау министрлігі хабарлады.
Қайтыс болғандар арасында 98 адамның Covid жұқтырғаны ПТР тестімен расталған (КВИ+). Қалған 36 адамда ПТР теріс нәтиже көрсеткен, олардың диагнозы ауру белгілері бойынша қойылған (КВИ-). Соңғысын "ковидтектес пневмония" деп атап жүр.
КВИ+ бойынша, Алматыда 28 адам, Шымкентте 18 адам көз жұмған. КВИ- бойынша, көш басында Жамбыл облысы тұр. Онда "ковидтектес пневмонияға" шалдыққан 10 кісі қайтыс болған.
Қазақстанда шілденің соңынан бері коронавирустан күн сайын жүзден астам адам қайтыс болып жатыр. Денсаулық сақтау министрлігі аурудың бұлай ушығуын алғаш рет Үндістанда анықталған "дельта" вариантының тарауымен байланыстырады.
Бұл вариант Қазақстанда маусымның соңында тіркелген. Жұқпалығы мен қаупі жоғары бұл вариант келгелі науқастар саны күрт артты. 27 шілде мен 21 тамыз аралығында күн сайын 7-8 мың науқас тіркеліп жүрді.
Шілденің басында үкімет қызмет көрсету саласында жұмыс істейтіндерді вакцина салдыруға міндеттеді. Олар екпенің бірінші дозасын 10 тамызға дейін, екіншісін 1 қыркүйекке дейін алуы керек болды. Вакцина салдырғысы келмегендер, апта сайын теріс нәтижелі ПТР анықтамасын өткізуі мәжбүр.
Денсаулық сақтау министрлігінің мәліметінше, 19 миллион халқы бар Қазақстанда 5,4 миллионнан астам адам вакцинаны толық алған. Бұдан бөлек, 1,2 миллионнан астам адам екпенің екінші дозасын күтіп отыр.
Кейінгі күндері Covid науқастары бойынша тәулік көрсеткіші төмендей бастағаны байқалады. Мәселен, 31 тамыз күні коронавирус бар болғаны 4320 адамның анализінен анықталған.
Індет басталғалы елде барлығы 794 мыңға жуық адамның Covid жұқтырғаны ПТР тестімен расталған. Оның 9402-сі аурудан айыға алмай, қайтыс болған. Бірақ билік бұл статистикаға коронавирус жұқтырғаны расталған, бірақ "өзге аурудан қайтыс болды" деген 2633 адамды қоспай отыр.
Үкімет "ковидтектес пневмония" есебін жүргізуді былтыр 1 тамызда бастаған. Содан бері пневмонияның бұл түрі 69 790 адамнан анықталған, оның 4464-і қайтыс болған.
1 қыркүйектегі мәлімет бойынша, елде 110 420 адам коронавирус инфекциясынан (–103 553+ және 6 867 КВИ-) емделіп жатыр.
Олардың ішінде 23 744 пациент стационарда, 86 676 науқас амбулаториялық деңгейде ем қабылдауда.
КВИ+, КВИ- шалдыққандардың арасында:
• 1 704 адамның жағдайы ауыр,
• 493 пациенттің жағдайы өте ауыр,
241 науқас ӨЖЖ аппаратында жатыр.
Сондай-ақ, бүгінге дейін Қазақстанда коронавирус инфекциясына қарсы вакцинаның 1-ші компонентін - 6 669 969, 2-ші компонентін 5 438 316 адам салдырған.
