Коронавирусқа байланысты бір айда Қазақстан шекарасынан өтетін адамдар саны 10 есеге азайды. Бұл туралы ҚР Ұлттық қауіпсіздің комитеті төрағасының орынбасары – Шекара қызметінің директоры Дархан Ділманов мәлім етті, деп хабарлайды "Ұлт ақпарат".
«Шекарадан өтетіндер айтарлықтай азайды. Бізде жылына 48 миллионға жуық адам өтеді, яғни олардың арасында біздің азаматтар мен өзге де елдердің азаматтары бар. Қазір бір айдың барысында 10 есеге азайғанын байқап отырмыз. Бұл түсінікті реакция (коронавирусқа қатысты), себебі адамдар өзінің денсаулығына алаңдайтыны белгілі», - деді Ділманов Сенатта тілшілер сауалына жауап бере отырып.
Оның сөзіне қарағанда, шекара күзетінде тұрған әскерилер арасында карантинге жатқызылғандар жоқ.
Сонымен қатар Дархан Ділманов шекарадан өткендер коронавирусқа қатысты туындаған ахуалды жақсы түсініп жүргенін, сондықтан ешқандай келіспеушілік жағдайлар болмағанын атап өтті.
«Жолаушылар келген кезде, карантинге жіберілуі мүмкін екенін біледі. Бұл тұрғыда ешқандай проблема көріп тұрғанымыз жоқ», - деді Шекара қызметінің директоры.
570 рет оқылды
_80_80.jpg)
