09 мау, 2019 сағат 08:15

Қасым-Жомарт Тоқаев сайлауда дауыс берді (Видео)

Кандидат Қасым-Жомарт Тоқаев елордадағы «Астана Опера» театрында орналасқан №115 сайлау учаскесінде өз дауысын берді, деп хабарлайды "Ұлт ақпарат".

«Бүгін еліміз үшін ерекше тарихи күн. Азаматтарымыз өз конституциялық құқығын пайдаланып сайлауда дауыс беруде. Бұл халқымыздың жарқын болашағы үшін жасайтын таңдауы. Сайлау меніңше бұл үлкен мереке. Сайлау - бұл кандидаттардың ел болашағы үшін жасалатын ұсыныстары мен бағдарламаларының бәсесеге түсетін додасы. Еліміздің басты құндылығы ол - татулық, бірлік, ынтымақ. Сондықтан қай кезде де басты құндылықтарымызды көздің қарашығындай сақтауымыз қажет. Бүгінгі бәсекенің заңға сәйкес демократиялы түрде өтетініне сенім білдіремін», - деді Қ. Тоқаев.

№115 учаскеде бірінші болып дауыс берген сайлаушы – астаналық Әсел Қиянбекова. Ол дәл осы учаскеге Қасым-Жомарт Тоқаевтың келетінін білмеген.

"Мен Қасым-Жомарт Тоқаевтың дәл осы жерге келіп, дауыс беретінін білмеппін. Әрине, қуаныштымын. Сайлау - барша қазақстандықтар үшін аса маңызды шара. Бұл - алдағы бесжылдықтың болашағы ғана емес, жалпы келешегіміздің жауапты бір кезеңі, балаларымыздың болашағы. Сондықтан әрбір адам келіп, өз дауысын беруге міндетті деген ойдамын", - деп атап көрсетті Қиянбекова.

Айта кетсек, Қасым-Жомарт Тоқаев дауыс берген сайлау учаскесінде барлығы 2 500 адам тіркелген, қазіргі уақытта оның мыңға жуығы өз таңдауын жасады.

Еске сала кетсек, бүгін Қазақстан Президентін кезектен тыс сайлау басталды. ҚР Президентінің кезектен тыс сайлауында ел ішінде және шет елдерде 9 968 дауыс беру учаскесі жұмыс істейді. Сайлау туралы Конституциялық заңға сәйкес, дауыс беру уақыты стандартты (сағат 7.00-20.00 аралығы) болады.