Жаңа жыл түні Қарағандыдағы мейрамханалардың бірінде төбелес болып, пышақ жарақатынан 23 жастағы ер адам көз жұмған.
Қарағанды облысы прокуратурасы баспасөз қызметінің хабарлауынша, 1 қаңтарға қараған түні Қарағанды қаласындағы «Древний Рим» мейрамханасында жанжал пайда болып, соңы жаппай төбелеске ұласып кеткен. Оқиға барысында бір адам қаза болып, тағы үшеуі түрлі деңгейде жарақат алған.
Тәртіп сақтау органдарымен Қылмыстық кодекстің 99 бабы (адам өлтіру) және 293 бабы (бұзақылық) бойынша қылмыстық іс қозғалды.
Қазіргі сәтте тергеу жұмыстарының нәтижесінде қақтығысқа қатысқандардың қатарынан 3 адам ұсталып, 1 қатысушыға іздеу жарияланды.
«Бұған қоса, мессенджерлер мен әлеуметтік желілер арқылы белсенді түрде аталмыш жанжал туралы күмәнді ақпарат таратылуда, дәлірек айтар болсақ, екі адам қайтыс болып, жанжал ұлтаралық алауыздық негізінде пайда болды деп мәлімделуде. Қақтығыс екі топ арасында пайда болғаны және ол ұлтаралық алауыздық сипатында болмағаны туралы деректерге назар аударамыз, себебі екі топта да қазақ және басқа ұлт өкілдері болған. Азаматтарды үгіттеулер мен үндеулерге берілмей, тергеу органдары тарататын анық ақпаратты қадағалауларын өтінеміз. Заңнаманы бұзудың алдын алу мақсатында қасақана ұлттық алауыздық пен қастастықты өршітуге бағытталған әрекеттер Қылмыстық кодекстің 174 бабымен қарастырылған қылмыстық жауапкершілікке тартылатыны туралы ақпараттандырамыз» дейді баспасөз өкілдері.
Осыған байланысты облыс прокуратурасы азаматтар мен бұқаралық ақпарат құралдарының өкілдерін тек қана қылмыстық қудалау органдарының ресми мәліметтеріне жүгінуге шақырады.
Құқық қорғау органдары тергеу жұмыстарының толықтай ашықтығын қамтамасыз етеді, тергеу барысы туралы барлық ақпарат БАҚ-да және әлеуметтік желілерде жарияланатын болады.
Тергеу барысы облыс прокурорының ерекше бақылауына алынды.
2366 рет оқылды
_140_110.webp)
