Қорғаныс министрлігінің генерал-майоры Қайрат Көпбаев екі айға үйқамаққа алынды. Бұл ақпаратты Қорғаныс министрлігі растады, деп хабарлайды "Ұлт ақпарат".
«Жемқорлыққа қарсы келісім аясында Сыбайлас жемқорлыққа қарсы іс-қимыл агенттігімен бірлесе жүргізген шаралардың арқасында ҚР Қорғаныс министрлігінің кадрлар департаментінің бұрынғы бастығы – генерал-майор Көпбаев ұсталып, қазір оған қатысты сотқа дейінгі тергеу амалдары жүргізіліп жатыр. Қазіргі уақытта генерал-майор Көпбаевқа қатысты 2 ай мерзімге үйқамақта ұстау бұлтартпау шарасы қолданылды», - деді тілшілерге ҚР Қарулы күштері әскери полициясы бас басқармасы бастығының орынбасары Бекен Шынтілеуов.
Оның айтуынша, БАҚ-та генерал-майор Көпбаевтың кадрлар және әскери білім департаментін басқаратыны жайлы ақпарат тарап кеткен.
«Бұл мәлімет дұрыс емес. Лауазымды қызмет пен әскери атағына қарай оның лауазымы – ҚМ кадрлар департаментінде болған. Оның әскери білім департаментіне қатысы жоқ», - деді Бекен Шынтілеуов.
Қылмыстық заңнамаға сәйкес, айтарлықтай шығынға 50 АЕК-тен басталатын (130 мың теңге) сома жатады.
Еске салсақ, ҚР Қорғаныс министрлігінің генералы жүйелі түрде пара алды деген күдікпен ұсталғаны туралы хабарлаған болатынбыз.
995 рет оқылды
_80_80.jpg)
