Еуразия экономикалық одақ кеңесі жеке тұлғалар үшін Еуразия экономикалық одағының кеден аумағында автомобильдер мен басқа көлік құралдарының уақытша жүріп-тұру мерзімін 30 қыркүйекке дейін ұзартты, деп хабарлайды Еуразия экономикалық одағының баспасөз қызметі.
Осылайша автомобильдер мен басқа техниканы уақытша кіргізген азаматтар 30 қыркүйекке дейін оларды ЕАЭО-дан қайта шығару міндетінен босатылды. Тиісінше оларға қатысты әкімшілік шаралар қолданылмай, кедендік төлем төленбейді.
Бұл шешім сондай-ақ Калининград облысынан жеңілдік тәртібімен кеденнен өткізілген көлікпен келіп, үйіне орала алмаған азаматтарға да қатысты.
Кеңес сондай-ақ ЕАЭО-ға тұрғылықты мекенжайға көшіп келген тұлға, босқын, шарасыздан қоныс аударушылардың одаққа жеке мүлігін баж салығын төлемей кіргізудің 18 айлық мерзімін 30 қыркүйекке дейін тоқтатты.
Шешім 1 наурыздан 30 қыркүйекке дейін туындаған немесе туындайтын мәселелерге қатысты болады. Бұл шешім ЕАЭО-ның коронавирус індетіне қарсы күрес бойынша қабылдаған шараларына байланысты азаматтардың өз құқықтарын іске асырып, міндеттерін орындау мүмкіндігінің жоқтығы себебімен қабылданған.
919 рет оқылды
