Қазақстан Ұлттық тарихшылар конгресінің VIII отырысында Абай интерактивті кешенінің тұсауы кесілді, деп хабарлайды "Ұлт ақпарат".
Отырыс барысында Абай интерактивті кешенінің тұсауы кесілді. Кешенді ҚР Білім және ғылым министрлігі ғылым комитетінің тапсырысымен Л.Гумилев атындағы Еуразия ұлттық университетінің Абай академиясы ғылыми-зерттеу институты әзірледі.
«Бұл кешен бірнеше бөлімнен тұрады. Ең алғашқы бөлім – Абай тұғырнамасы. Ақын замандастары мен ұрпақтарының естеліктері, абайтанушы ғалымдардың академиялық зерттеулері осында толығымен жинақталған. Екінші бөлім – Абайдың шығармашылық әлемі. Ақын өлеңдері мен қара сөздерінің, поэмалары мен аудармаларының әрқайсы жеке-жеке аннотациялық сипатта талданған және әр туындының толық мәтіні аудионұсқа түрінде берілген», - дейді Абай академиясы ғылыми-зерттеу институтының директоры Ерлан Сайлаубай.
Аталған кешенде оқырман Абай қара сөздерінің шығу тарихымен танысып, аудионұсқада тыңдай алады.
«Келесі тарау – бейнедәрістер. Бұл тарауда Абайдың өмірбаяны мен шығармашылық мұрасын жаңаша баяндау мақсатында танымдық академиялық дәрістер топтамасы берілген. Дәрісті абайтанушы ғалымдар оқыды. Сонымен қатар, кешенде онлайн кітапхана бар. Онлайн кітапхананың ерекшелігі – ақын шығармашылығы туралы барлық зерттеу, ғылыми-танымдық кітаптар цифрлық форматта толық мәтінде қойылған. Оқырман өзі қалаған зерттеушісінің еңбектерін оқып, толық таныса алады. Кешеннің тағы бір бөлігі – Жидебай-Бөрілі деп аталады. Онда Абайдың Жидебай-Бөрілі мемлекеттік тарихи-мәдени және әдеби-мемориалдық қорық-музейінің құрамына кіретін Семейдегі бас мұражайы, «Алаш арыстары – М.Әуезов» мұражайы, Жидебайдағы Абайдың мұражай-үйі, Шәкәрім мұражайының фото-бейненұсқалары орналасқан. Кешеннің тағы бір мазмұнды, мағыналы бөлімі – 20 поэзия бөлімі деп аталады. Мұнда Абай өлеңдері негізінде 15 арнайы қойылым түсірілген. Қойылымның ерекшелігі – кәсіби актерлер Абай шығармашылығының мазмұнына сәйкес тамаша қойылымдар ойнап шықты», - дейді ол.
Аталған шара Әбу Насыр әл-Фарабидің 1150 жылдық, Абайдың 175 жылдық мерейтойы және «Ұлық Ұлыс» – Алтын Орданың 750 жылдығына орай өтті.
1857 рет оқылды
