Жандос Бүркітбаев денсаулық сақтау министрі міндетін атқарады, деп хабарлайды "Ұлт ақпарат".
"Денсаулық сақтау министрінің міндетін атқару денсаулық сақтау вице-министрі Жандос Қонысұлы Бүркітбаевқа жүктелсін", - делінген Премьер-министр қол қойған құжатта.
Айта кетейік, 20 желтоқсанда Мемлекет басшысы Қасым-Жомарт Тоқаев Алексей Цойды Денсаулық сақтау министрі қызметінен босату туралы Жарлыққа қол қойды.
Содан кейін аталған министрліктің баспасөз қызметі Цойдың өз еркімен қызметінен босатылғанын айтты.
Ал Алексей Цой әлеуметтік желіде жазба жариялап, денсаулық сақтау саласын ғылым мен әлеуметтік бастамалар арқылы дамытуды қолға алатынын мәлімдеді.
Жандос Бүркітбаев 1971 жылдың 27 ақпанында Жамбыл облысы, Талас ауданының Ақкөл селосында дүниеге келген.
1996 жылы "Емдеу ісі" мамандығы бойынша Асфендияров атындағы Алматы Мемлекеттік медицина университетін, 2003 жылы "Мемлекеттік және жергілікті басқару" мамандығы бойынша Лев Гумилев атындағы Еуразия ұлттық университетін, 2007 жылы "Фармация" мамандығы бойынша Оңтүстік Қазақстан медицина академиясын бітірген.
Еңбек жолын 1996 жылы Алматы қаласындағы қалалық клиникалық ауруханасының жедел медициналық көмек көрсету дәрігерінен бастаған.
Әр жылдарда Алматы қаласының Апаттар медицинасы республикалық орталығының дәрігері, Қазақстан Республикасы Денсаулық сақтау министрлігінің Білім және ғылым басқармасының бас маманы, Қазақстан Республикасы Денсаулық сақтау министрлігінің Дәрілік саясат, медициналық және фармацевтикалық өндірісті дамыту, ұйымдастыру-бақылау жұмыстары бөлімінің бас маманы, Қазақстан Республикасы Денсаулық сақтау министрлігінің Медициналық және фармацевтикалық өндіріс және ақпараттық – аналитикалық қолдау бөлімінің бастығы, Қазақстан Республикасы Денсаулық сақтау министрлігінің Фармацевтикалық және медициналық өндірісті және дәрілік саясатты дамыту басқармасының бастығы, Қазақстан Республикасы Парламент Мәжілісінің Әлеуметтік-мәдени даму бойынша комитетінің Қызметті қамтамасыз ету бөлімі меңгерушісінің орынбасары, "Ақтөберентген" АҚ басшылығының құрамында қызмет атқарған.
2008 жылы Астана қаласының "Қан орталығы" ШЖҚ ҚКК басшысы болып тағайындалды.
Мемлекет басшысының Жарлығымен "Қазақстан Республикасының Тәуелсіздігіне - 25 жыл" мерекелік медалімен, белсенді қайырымдылық қызметі және мейірімділігі үшін "Шапағат" медалімен марапатталды.
"Денсаулық сақтау ісіне қосқан үлесі үшін", "Қазақстан Республикасы денсаулық сақтау ісінің үздігі" төсбелгілерінің иегері.
1483 рет оқылды
_80_80.jpg)
