Биыл Қазақстанның мәдени өмірінде екі маңызды мерейтой аталып өтіледі

Фото: ОКҚ

Биыл Жамбыл атындағы Қазақ мемлекеттік академиялық филармониясының 90 жылдығы мен  «Салтанат» мемлекеттік би ансамблінің 70 жылдық мерейтойы. Осы маңызды оқиғаларға арналған ауқымды мерекелік бағдарлама әзірленді, бұл туралы Қазақстан Республикасы Президенті жанындағы Орталық коммуникациялар қызметінде өткен баспасөз конференциясында айтылды деп хабарлайды Ult.kz.

ҚР Мемлекеттік «Салтанат» би ансамблінің директоры Е. Кенжалиевтың сөзінше «Салтанат» мемлекеттік би ансамблі - қазақтың төл өнері мен ұлттық мәдениетін сақтап, халықтың рухани байлығын, «Алтын қорды» дамытып, өскелең ұрпаққа ғажайып өнер арқылы рух пен тәрбие беріп, жастардың бойына ұлттық патриоттық сана сезімін қалыптастыру жолында аянбай өнер көрсетіп келеді.

Фото: ОКҚ

"Қазақтың хореография мәдениетінің бай мұрасын және әлемдік хореографияның алуан түрлілігін толық насихаттай алатын жетпіс жылға жуық тарихы бар ең үздік бірегей кәсіби би ұжымы саналады деп мақтанышпен айта аламын. Ұжымның ең басты ерекшелігі — қазақ халқының би өнерін сақтай отырып, оны қазіргі замандағы деңгейде орындап, әлемге насихаттап жүр. Олар түрлі стильдер мен жанрлардағы би элементтерін ұтымды ұштастырыра білді. 70 жылдық тарихында «Салтанат» көптеген талантты бишілер мен хореографтарды тәрбиелеп шығарды. Олар қазір Қазақстанның мәдениетіне және әлемдік би өнеріне елеулі үлес қосып келеді. Ансамбльдің биік деңгейде өнер көрсетуі мен қазақ биінің айшықты мұрасын әлемге танытудағы рөлі ұшан-теңіз. Қазақстанның мәдениетінің дамуына   зор үлесін қосып жүрген  «Салтанат» ансамблі  халықтың өшпес мұрасын, өнерін ұрпақтан ұрпаққа жеткізу мақсатында қазақтың биін насихаттауды алдыңғы орынға қойды", -дейді ансамбль директоры. 

Ансамбльдің 70 жылдығына орай жоспарланған іс-шаралар: Қазақстан өңірлерінде өтетін «Би керуені» гастрольдік туры, Жас хореографтарға арналған шеберлік сабақтары, «Би – өнердің ордасы» атты деректі фильмнің телетүсірілімдері, Ансамбль тарихына арналған фотокөрмелер. Мерейтойдың шарықтау шегі – қараша айында өтетін салтанатты Гала-концерт болмақ. Бұл кеште көрермен ансамбльдің үздік қойылымдарын тамашалай алады.

Жамбыл атындағы Қазақ мемлекеттік академиялық филармониясының директоры Ақан Әбдуалиев 90-жылдық мерейтой – кез-келген өнер ұйымы үшін үлкен жетістік және оның тарихындағы маңызды кезең деп есептейді. Оның айтуынша қазақ мәдениетінің қара шаңырағы, филармонияның 90-жылдық тарихы – қазақ музыкасының дамуы мен мәдениетіміздің өркендеуіне қосқан зор үлесін көрсетеді. Мерейтой шеңберінде өтетін концерттер, шығармашылық кештер мен түрлі іс-шаралар мәдениет саласындағы маңызы зор оқиғаларға айналады. 

2025 жылдың І тоқсанына жоспарланған концерттер саны – 51, көрермендер саны – 13 583, орындалғаны: концерттер саны – 58, көрермендер саны – 16 591, оның ішінде Алматы қаласы бойынша өткен концерттер – 11.

Фото: ОКҚ

"2025 жылы филармонияда өтетін концерттердің барлығы Қазақстанның мәдени өмірінде ерекше орын алады. Бұл концерттер тек еліміздің көрнекті тұлғаларының мерейтойларымен ғана емес, Ұлы Отан соғысының 80 жылдығына арналған еске алу шараларымен де байытылып, ұрпақтарға тарихты тереңірек түсінуге мүмкіндік береді. Филармония әрқашан жоғары деңгейде өткізетін концерттері, сонымен қатар балаларға арналған абонементтік концерттері, фестивальдері мен іс-шаралары арқылы өнер мен мәдениеттің дамуына үлкен үлес қосып келеді", -дейді А. Әбдуалиев.

Мерейтой аясында ұйымдастырылатын негізгі іс-шараларды атап өтсек:  90-шы концерт маусымының ашылуы, «ХХ-25» Халықаралық симфониялық музыка фестивалі, «Қазақстандағы концерттік ұйымдардың дамуы мен болашағы» атты ғылыми-практикалық конференция, Филармония өнерпаздарының қатысуымен Республика сарайында өтетін  Гала-концерт өтпек. Сонымен қатар, филармония тарихы туралы мерейтойлық кітап шығарылып, шығармашылық ұжымның дауысы жазылған винил пластинкалар шығарылады. 2025 жылы филармония 195 концерт өткізуді жоспарлап отыр.

Бөлісу:

443 рет оқылды