Қазақстанның авиациялық әкімшілігі «Бек Эйр» авиакомпаниясының пайдаланушы және әуе кемелерінің ұшуға жарамдылығы туралы сертификатын қайтарып алған болатын. Осыған байланысты ҚР Индустрия және инфрақұрылымдық даму министрлігі аталған әуе компанияның бұрын сатып алынған әуе билеттерінің ақшасын жолаушыларға қайтаруға қатысты бірқатар сұрақ туындағанын айтты, деп хабарлайды "Ұлт ақпарат".
Еңбек заңнамасына сәйкес «Бек Эйр» АҚ қызметкерлерін еңбек жағдайларының өзгергені туралы жазбаша хабардар етуге, олардың еңбек қызметін растайтын құжаттарды беруге, сондай-ақ қызметкерлеріне өтемақы төлемдерін жүзеге асыруға тиіс.
«Инвестициялар және даму министрінің 2015 жылғы 30 сәуірдегі № 540 бұйрығымен бекітілген Жолаушыларды, багажды және жүктерді әуе көлігімен тасымалдау қағидаларына сәйкес әуе компаниясы бұрын сатып алынған билеттер үшін жолаушыларға ақшаны қайтаруға міндетті. Қазақстанның авиациялық әкімшілігі және Азаматтық авиация комитеті «Бек Эйр» АҚ-ның жұмыстан шығарылған қызметкерлеріне балама жұмыс табуға көмектеседі. Алдағы күндері арнайы сайт ашылады. Онда әуе компанияның қызметкерлері жұмыс іздеу үшін тіркеле алады», - деп хабарлады министрліктен.
Еске сала кетейік, 2019 жылдың 27 желтоқсанында Алматы-Нұр-Сұлтан бағытындағы ұшақ апатқа ұшырады. Бортында 93 жолаушы және 5 экипаж мүшесі болды. Әуе кемесінің командирі 57 жастағы Марат Мұратбаев оқиға орнында ажал құшты.
Ұшақ жерге құлаған соң сырғанап барып әуежай аумағына жақын орналасқан екі қабатты үйге соғылды. Салдарынан 12 адам қаза тапты. Осыдан кейін Bek Air әуе компаниясына тиесілі тоғыз Fokker-100 ұшағының қызметі тоқтатылды.
Арада бір ай өткеннен кейін апатқа ұшыраған Bek Air ұшағының екінші ұшқышы қаза болды.
806 рет оқылды
