Ауызашарды үйде беру мен қоржынға салып жеткізудің сауабы бірдей. Бұл туралы Қазақстан мұсылмандары діни басқармасының төрағасы, Бас мүфти Наурызбай қажы Тағанұлы айтты, деп хабарлайды "Ұлт ақпарат".
«Ораза кезінде бәріміз Тарауыққа, ауызашарға үйреніп қалдық. Өкінішке қарай, Алла Тағала бізге осындай кезеңді көруді жазыпты. Енді бұл кезеңнен де сақтықпен, ақылмен, мәдениеттілікпен өтуіміз керек. Қазір қолымыздан келгенше «ораза қоржыны» деген атпен ауызашар беру тәртібін насихаттап жатырмыз. Еліміздің бірқатар өңірі қызыл аймаққа өтіп, сары аймақта да бірнеше өңір бар. Сондықтан сақтық шарасына назар аударып, ораза ауызашарды барынша жеткізіп беру арқылы өткізсек деп отырмыз. Бұл бір-бірімізге деген құрметіміз болады», - деді Наурызбай қажы Тағанұлы Орталық коммуникациялар қызметіндегі брифинг барысында.
Бас мүфти ауызашарды жеткізіп беру мен үйде не дәмханада ауызашар берудің сауабы бірдей екендігін баса айтты.
«Сіз үйде немесе асханада ауызашар берсеңіз де, ауызашарды қоржынға салып, ауыз бекіткен жанға жеткізіп берсеңіз де сауабы бірдей болады. Ауызашар беру сүннет, сауапты амал. Міндеттелген амал емес. Ал адамның өмірін сақтау, қорғау бізге бұйырылған міндетті амал саналады», - деді Бас мүфти.
1686 рет оқылды
