Фото: © Мәдениет және спорт министрлігі
Қазақстандық режиссер Айсұлтан Сейітов Шанхайдың 25-ші мерейтойлық халықаралық кинофестивалінде "ҚАШ" дебюттік картинасымен "Үздік режиссер" номинациясын жеңіп алды, деп хабарлайды "Ұлт ақпарат" Мәдениет және спорт министрлігіне сілтеме жасап.
"ҚАШ" фильмі қысқа тізімге еніп, Asian New Talent санатындағы бірден үш номинацияда жеңіске жетті: Best Film — Aisultan Seitov, Best Director — Aisultan Seitov, Best Script Writer —Ablay Nurmanbetov.
Фестиваль бағдарламасында туындыны Айсұлтан Сейітов, Qara Studios бас продюсері Еркебұлан Күрішбаев және сценарий авторы Абылай Нұрманбетов таныстырды.
Айта кетейік, "ҚАШ" фильмінің түсірілімі 2020 жылы басталған. Ал 2022 жылы Қазақстанда жалпы прокатқа шықты. Фильмді көрермендер жылы қарсы алды, сондай-ақ ол қазақстандық киносыншылардың бірқатар марапатын алды.
Көркем туынды 1931-1933 жылдардағы қазақ даласындағы жаппай ашаршылық трагедиясын екі ағайындының жеке оқиғасы арқылы баяндайды.
Шанхай кинофестивалі кең халықаралық бағдарламасы бар Қытайдың ең ірі кинофестивалі және беделді халықаралық кинофестивальдердің бірі болып табылады. Биыл бұл шара 9-18 маусым аралығында өтті.
823 рет оқылды
