Фото: Ult.kz
Қазақстан Республикасы Мемлекеттік орталық музейі «Art Dolls Collection_KZ» шығармашылық одағымен бірлесіп «Шығыстан Батысқа дейін» коллекциялық қуыршақтар көрмесін ашты, деп хабарлайды Ult.kz.
Фото: Ult.kz
Аталған көрмеде Шығыс пен Батысты, олардың мәдениеті мен эстетикасын, өзіндік образдарын біріктіретін терең байланыс көрініс тапқан.
Фото: Ult.kz
Ғалия Теміртон, ҚР Мемлекеттік орталық музей директорының міндетін атқарушы:
«Байқасаңыздар, бұл қуыршақтардың ішінде әртүрлі заман, әртүрлі дәуір, әртүрлі категорияларда адамдардың бейнесі болсын, жануарлардың бейнесі болсын, соның ішінде тарихи замандарға байланысты қуыршақтар көп. Оның ішінде өзіміздің қазақтың тарихына байланысты хандардың бейнелері, батырлардың бейнелері, қазақ халқының дәстүрлі қоғамы кезіндегі өмірден бейнелер көруге болады. Және әрине әлем халықтарының тарихы болсын, ертегілері болсын, жыр-жыраулары болсын, соның ішіндегі өкілдерге де байланыстырып үлкен көріністерді көруге болады».
Фото: Ult.kz
Қуыршақ өнері елімізде жаңадан дамып келе жатқан өнер түрі. Осыған қарамастан, «Art Dolls Collection_KZ» шығармашылық одағының құрамына кіретін бірқатар шеберлер бас қосып, Алматы, Астана, Риддер, Жаркент қалаларынан жиналған 21 шебер 140 авторлық жұмысын осы көрмеге ұсынып отыр.
Фото: Ult.kz
Ғалия Теміртон, ҚР Мемлекеттік орталық музей директорының міндетін атқарушы:
«Айта кету керек, бұл өнердің Қазақстан жерінде дамып жатқан көрініс, бұл қуыршақтарды тек қана ойыншық ретінде көрсету емес, бұл жерде осы қуыршақтардың бойында да мәдени де, тарихи да мағына жатыр. Яғни осы қуыршақтардың негізінде біз бүгінгі музейге келушілерге де осы қуыршақтармен көрсетілген бейнелер арқылы көптеген тарихи сыр мен көріністерді көрсетіп жатырмыз. Қызығушылық өте зор. Өйткені бұл өте бір ерекше өнер. Осы өнерге берілген адамдардың бойындағы талантымен бірге, тігу, көркемдік, қуыршақтарды әсемдеу, ою өрнекті білу, түрлі материалдарды қолдану сияқты әртүрлі бағыттарды біліп, еңбек жасау бір қуыршақ өнерінің аясында шығаратын үлкен өнер».
Фото: Ult.kz
Көрменің мақсаты – алматылықтар мен қала қонақтарына еліміздегі талантты шеберлерді таныстыру. Әрбір жұмыс бірегей және оларды бірнеше апталар мен айлар бойы жасайды. Тынымсыз еңбек пен шеберліктің нәтижесінде дүниеге келген бұл бірегей туындылар жеке коллекцияларда сақталып, әлемнің түрлі галереяларында лайықты орындарын тауып келеді.
Фото: Ult.kz
«Art Dolls Collection_KZ» шығармашылық бірлестігінің коллекциялық қуыршақтар көрмесінде қуыршақ шеберлерінің түрлі техникада жасалған авторлық жұмыстары ұсынылды.
Ақбота Мұсабекқызы
1324 рет оқылды
