Алматы полициясы брифинг кезінде террористік әрекет жасамақ болды деген күдікпен ұсталғандардың қандай мақсаты болғанын айтты, деп хабарлайды "Ұлт ақпарат".
Қалалық ІІД-нің ресми өкілі Салтанат Әзірбектің айтуынша, тергеу барысында күдікті Жұмағұлов, Омыров, Әбішевтер құқық қорғау органдарына қарсы бүлік шығармақ болғаны анықталды.
«Тергеу барысында Жұмағұлов басқарған топ құқық қорғау органдары мен мемлекеттік құрылымдарға қарсы қарсылық ұйымдастырмақ болғанын дәлелдейтін деректер табылды. Сонымен қатар, олар полиция қызметкерлеріне қоңырау шалып, отбасы мүшелерін қорқытпақ болған. Бет-ауыздарын бүркеп мемлекеттік орган басшыларының атына видеохабарлама жіберуді жоспарлаған», - деді С.Әзірбек.
Ұйымдастырушы жеке кәсіпкерлердің қаржысына қылмыстық топты қаржыландыруды көздеген.
«А. Жұмағұлов ақша алу мақсатында жеке кәсіпкерлерден ақша бопсалайтын қылмыстық топ құрмақшы болған. Осы мақсаттарда Қырғызстаннан қару әкелуді жоспарлаған. Құқық қорғау органдарының өкілдері оларды ұстаған жағдайда кінәні өз мойнына алатын адамдарды да іздеген. Жасырыну мақсатында ұялы телефондар мен сим-карталарды алып қоюды жоспарлаған. Ақша бопсалағаннан кейін А.Жұмағұлов құқық қорғау органдарының қызметкерлеріне белсенді түрде шабуыл жасамақшы болды», - деді Салтанат Әзірбек.
Кәсіпкерлерді бопсалаудан түскен ақшамен Жұмағұлов құқық қорғау органдарының қызметкерлеріне қарсы белсенді шабуыл жасамақ болған.
Айта кету керек, 25 қарашадан бастап қалалық ІІД Жұмағұлов, Омыров, Әбішевке қатысты қылмыстық істі тергеп жатыр. Күдіктілерге ҚР ҚК 256-бабы «Терроризмді насихаттап, терроризм актісін жасауға ашық түрде шақырды» деген айып тағылып отыр.
2925 рет оқылды
_140_110.webp)
