Әлемдегі бірқатар ел Ресей ұшақтарын әуе кеңістігіне жібермеуіне байланысты АҚШ-тың Мәскеудегі елшілігі Америка азаматтарын Ресейден тез арада кетуге шақырды.
"Әуе компаниялары бірінен кейін бірі ұшуды доғарып жатыр… АҚШ азаматтары әзірге ұшып жатқан коммерциялық рейстермен болса да, Ресейден кетіп қалуды ойластырғаны дұрыс", - дейді АҚШ дипмиссиясының сайты.
Батыс Ресейдің Украинаға шабуылын Екінші дүниежүзілік соғыстан кейінгі ең ірі шабуыл деп санап, Мәскеуге қатаң санкциялар салған.
27 ақпанда Еуропа одағына мүше мемлекеттер сыртқы істер министрлерінің кездесуінен кейін олардың дүйсенбіден бастап Ресей ұшақтарына әуе кеңістігін жабу жөнінде уағдаласқаны мәлім болды. Оған дейін Еуропаның кей елдері өз бетінше осындай шара қолға алған болатын. Мәскеу бұл әрекетке дәл солай жауап беріп, бұл елдердің ұшақтарына Ресей әуе кеңістігін жабатынын мәлімдеді.
Еуропа елдерінің әуе кеңістігінің жабылуына байланысты "Аэрофлот" 28 ақпаннан бастап Еуропаға ұшатын барлық рейсін тоқтататынын хабарлады.
983 рет оқылды
