14 мау, 2021 сағат 12:55

Әділхан Ержановтың фильмдері Шанхайдағы кинофестивальде көрсетілмек


Режиссер Әділхан Ержановтың «Ұлболсын» және «Сары мысық» атты қос көркем фильмі Шанхайда өтетін халықаралық кинофестивальде көрсетіледі, деп хабарлайды "Ұлт ақпарат".

Қытайдағы «А» санатындағы жалғыз кинематографиялық шара кезекті, 24-ші Шанхай халықаралық кинофестивалі (SIFF) қытайлық мегаполисте 11-20 маусым аралығында өтеді. 

Ұйымдастырушылардың айтуынша, «Алтын кубокты» табыстау салтанаты (Golden Goblet Awards) 19 маусымда өтпек. «Алтын кубок» негізгі байқау бағдарламасы толық және қысқа метражды фильмдерді, анимациялық кино мен документалды жұмыстарды қамтиды.

Өткен жылы фестивальге 180 ел мен өңірден 3 693 фильм тіркелген. COVID-19 пандемиясына байланысты өткен жылғы Шанхайдағы кинофестивальдің бағдарламасы қысқартылып, байқау бағдарламасындағы марапаттар табысталмады.

Шанхай халықаралық кинофестивалі 1993 жылдан бастап өткізіледі.