Жұмыссыз жастарды кәсіби біліммен қамту мәселесін жан-жақты пысықтау қажет. Бұл туралы бүгін Үкімет отырысында ҚР Премьер-Министрінің орынбасары Ералы Тоғжанов айтты, деп хабарлайды ҚазАқпарат.
«Жоспарланған іс-шаралар білім беру жүйесін жаңа деңгейге көтеріп, бәсекеге қабілеттілігін арттыруға бағытталған. Бірнеше бағытқа назар аударғым келеді. Біріншіден, 2-6 жастағы балаларды мектепке дейінгі білім берумен қамтуды 2025 жылға дейін 95 пайызға жеткізуді қамтамасыз ету міндеті тұр. Ол толықтай орындалады. Екіншіден, әкімдіктер биыл салынуы тиіс 200 жаңа мектеп құрылысына, жаңғыртылуы қажетті 1 015 мектепке тұрақты мониторинг жүргізу және оның орындалуы туралы ай сайын ақпарат беріп отырғаны дұрыс», - деді Үкімет басшысының орынбасары.
Үшіншіден, ол орта білім беруге байланысты ауыл мен қаладағы білім сапасын теңестіру мәселесі күн тәртібінде тұрғанын баса айтты. Сондықтан әкімдер осы бағытты ерекше бақылауға алуы қажеттігін ескертті.
«Төртіншіден, өңірлерде биыл енгізілген қосымша білім беру мемлекеттік тапсырысын іске асыруға жан-жақты дайындық жүргізілуі тиіс. Ашығын айтқанда бұл жаңалықты көпшілік күтіп отыр. Сондықтан қажетті қаржы бөлініп, тиісті ұйымдастыру жұмысы іске асырылуы керек. Бесіншіден, білім министрлігі әкімдіктермен бірге тегін кәсіби-техникалық білім беру аясында жұмыссыз жастарды көбірек кәсіби біліммен қамту мәселесін де жан-жақты пысықтауы қажет», - деді Ералы Тоғжанов.
925 рет оқылды
_80_80.jpg)
