Жергілікті атқарушы органдар жас дәрігерлерді әлеуметтік қолдау іс-шараларын лайықты деңгейде қабылдамай отыр. Бұл туралы Үкімет отырысында ҚР Денсаулық сақтау министрі Алексей Цой айтты, деп хабарлайды ҚазАқпарат.
«2020 жылы жұмысқа орналасқан 1 683 түлектің тек 25 пайызы, оның ішінде ауылдық жерлерде 37 пайызы ғана әлеуметтік қолдау іс-шараларымен қамтылған. Бұл ретте түлектерді әлеуметтік қолдау іс-шараларымен қамтудың жоғары көрсеткіші Қостанай облысында - 81, Солтүстік Қазақстан облысында – 70, Атырау облысында – 57, Батыс Қазақстан облысында 51 пайыз болса, төмен қамту Алматы облысында – 13, Ақтөбе облысында – 12 және Түркістан облысында 7 пайыз ғана», - деді министр.
Оның айтуынша, ауылдық жерлерге барған жас дәрігерлерді әлеуметтік қолдаумен ең төмен қамту 5 облыста тіркелген. Нақты айтқанда, ауылға барған мамандардың Түркістан облысында – 8, Алматы облысында – 9, Павлодар облысында – 14, Маңғыстау облысында – 29 және Шығыс Қазақстан облысында 35 пайызы әлеуметтік қолдаумен қамтылған.
«Осылайша, жергілікті атқарушы органдар әлеуметтік кепілдендіруді қамтамасыз ету және жергілікті жерлерге кадрларды бекіту бойынша іс-шараларды лайықты деңгейде қабылдамай отыр», - деді Алексей Цой.
1054 рет оқылды
_80_80.jpg)
