Нұр-Сұлтан, Алматы мен Шымкент қалаларының жастары жалдамалы пәтерге ие болуы үшін қандай құжаттарды өткізуі тиіс? Толыққанды құжаттар тізімін Орталық коммуникациялар қызметінде өткен баспасөз мәслихатында ҚР Ақпарат және қоғамдық даму министрлігі Жастар және отбасы істері комитетінің төрағасы Мадияр Қожахмет айтып берді, деп хабарлайды ҚазАқпарат.
«Ережеге сәйкес, өтініш қабылдау басталғаннан кейін үміткерлер мынадай құжаттарды тапсыруы керек: өтініш, жеке басын куәландыратын құжаттың көшірмесі, білімі туралы құжаттың көшірмесі, неке қию туралы құжаттың көшірмесі (бар болған жағдайда), балаларының тууы туралы куәліктің көшірмесі (бар болған жағдайда), өтініш берушіге және отбасының барлық мүшелеріне жылжымайтын мүліктің бар-жоғы туралы анықтама, жұмыс орнынан анықтама, өтініш берушінің банк шотының болуы және оның нөмірі туралы анықтама, банк шоты бойынша ақшаның қалдығы мен ай сайынғы айналымы туралы үзінді, өтініш берушінің түрлі қызмет саласындағы жетістіктерін растайтын құжаттар (бар болған жағдайда)», - деді Мадияр Қожахмет.
Құжаттар қабылданғаннан кейін уәкілетті орган оның бәрін тексеріп, толықтығы мен сәйкестігін қарайды.
«Осыдан кейін ұпайларға сәйкес санақ жүргізіліп, жалдамалы пәтер берілетін жастардың тізімі бекітіледі. Бұл тізімге ұпайларды есептеу кезінде өтініш берушінің кәсібі, отбасылық жағдайы, жеке кәсіпкерлік қызметі, бюджеттік қызметтерде жұмыс істеуі, шоттарының жинақтары ескеріледі. Балдары тең жағдайда өтінішті бірінші тапсырған жастарға басымдық беріледі. Сонымен бірге, негізгі талаптардың бірі – жастар табысы 40 АЕК-тен төмен болмауы керек. Мысалы, жалдамалы пәтер үшін жас жігіт 10-12 мың, оған қосымша коммуналдық шығындар үшін тағы 10-15 мың теңге төледі делік. Оның айлығы 110 мың теңге болса, яғни, ол жалақысының жартысының жартысын банкте бастапқа жарна ретінде жинай алады», - деді ол.
Сонымен қатар, комитет төрағасы жастарға берілетін жалдамалы пәтерлер қандай жағдайда мемлекетке қайтарылатынын айтты.
«Ережеде бекітілгендей, жергілікті әкімшілік пен өтініш беруші жалдамалы үй бойынша 5 жылға келісімшартқа отырады. Келісімшарттың негізгі талаптары негізінен жұмыс істеу тәртібіне негізделген. Егер өтініш берушіні жұмыстан мәжбүрлі түрде емес, арнайы босаса, пәтерді қайта тапсыру керек болады. Сол секілді басқа қалаға көшу жағдайында пәтерді өткізу керек. Жыл сайын жергілікті атқарушы орган үйдің жайын тексеріп отырады. Сондай-ақ, жас азамат өзі жалдамалы пәтерді ала отырып, басқа біреуге оны жалға беретін болса немесе тиісті деңгейде сақтамаса – онда пәтер мемлекетке қайтарылады. Пәтер жалпыға ортақ талапқа сай келуі тиіс. Жалдамалы пәтерді берудің осындай нақты талаптары бар», - деді Мадияр Қожахмет Орталық коммуникациялар қызметінде өткен баспасөз мәслихатында.
Сондай-ақ, жиын барысында Нұр-Сұлтан қаласы әкімдігінің қоғамдық даму басқармасының басшысы Талғат Рахманберді елорда жастарына жалдамалы пәтер қашаннан бастап берілетінін жариялады.
«Нұр-Сұлтан қаласында 14-29 жас аралығында 245 мыңнан астам азамат бар. Осы бағдарламаға сәйкес, жыл соңына дейін 1050 пәтер беру қарастырылған. Дәл қазіргі уақытта осы пәтерлердің тиісті конкурстық құжаттары дайындалып жатыр. Біз жоспар бойынша қараша айынан бастап бағдарламаға құжат қабылдаймыз. Ол үшін ешқайда барып, ешқандай кезекке тұрудың қажеті жоқ. Құжаттарды қабылдау «Смарт-Астана» алаңында толығымен электронды түрде өтеді. Ол туралы біз уақыты жақындағанда тағы да хабардар етеміз», - деді Талғат Рахманберді Орталық коммуникациялар қызметінде өткен баспасөз мәслихатында.
Аталмыш бағдарлама бойынша биыл Нұр-Сұлтанда - 1050 пәтер, Алматыда - 1050 пәтер, Шымкентте - 904 пәтер беріледі. Уәкілетті орган сатып алу құқығынсыз жалға берілетін тұрғын үйді беру туралы шешім қабылдаған соң 15 күнтізбелік күн ішінде тұрғын үйді жалдау туралы шарт жасалады.
Еске сала кетсек, былтыр Жастар жылының ашылуына арналған салтанатты жиында Елбасы Нұрсұлтан Назарбаев Астана, Алматы және Шымкент қалаларында жастар үшін жылына 1 мың пәтер салынатынын мәлім еткен болатын.
Ал былтыр күзде Үкіметтің кеңейтілген отырысында сол тұстағы Индустрия және инфрақұрылымдық даму министрі Жеңіс Қасымбек (қазір - Премьер-министрдің орынбасары) Астана, Алматы, Шымкент жұмысшы жастарына 1 мың пәтер салу мамырда басталатынын хабарлаған еді.
2375 рет оқылды
