20 қыр, 2024 сағат 22:57

Ынталы жас – ел болашағын қалайды

Фото:ttjk.info алынды

Балаларды марапаттау, ынталандыру қазір басты назарда. Физика, химия сияқты пән олимпиадаларында медаль алған оқушылар таңдаған университетіне грант алады, ақшалай сыйақысы және бар.

«Бірақ, халықаралық ғылыми конкурсқа қатысып, ғылыми жоба қорғаған балаларымыз елеусіз қалып келеді. Оларға мемлекет тарапынан ештеңе берілмейді. Нақты бір ғылыми зерттеумен айналысып, тыңғылықты жоба әзірлеген дарынды балаларды Оқу-ағарту министрлігі неге қолдамайды? Бұлар болашақ ғалымдар емес пе?», - деген еді журналист Оңғар Қабден.

Бұл сұраққа жауап ҚР Оқу-ағарту министрлігінің сайтында пайда болды. Жарияланған ақпаратта халықаралық олимпиадаларда нәтиже көрсеткен қазақстандық оқушылар мемлекет тарапынан қандай сыйақы алатыны айтылған.
Әлем бойынша ТОП-7 беделді олимпиадаларда жүлделі орын алған 26 қазақстандық оқушы қаржылай сыйақы алады. Сыйақының жалпы сомасы 77,5 миллион теңгеден асады.

2023-2024 оқу жылының қорытындысы бойынша еліміздің ұлттық құрамасы ең беделді әлемдік пәндік олимпиадаларда 2 алтын, 12 күміс, 12 қола медаль және бір диплом иеленді. Бұл олимпиадалар: IMO (математикадан), IPhO (физикадан), IBO (биологиядан), IChO (химиядан), IOL (лингвистикадан), IGeO (географиядан) және IOI (информатикадан).

Талантты оқушыларды қолдау мақсатында Мемлекет басшысының тапсырмасымен 2022 жылдан бастап халықаралық олимпиадалардың жүлделі орындарды иеленген оқушыларға және оларды дайындаған педагогтерге мемлекет тарапынан біржолғы сыйақы тағайындалған.

Алтын медаль жеңіп алған оқушы 1500 айлық есептік көрсеткіш (АЕК) мөлшерінде, күміс медаль үшін – 1000 АЕК, қола медаль үшін – 500 АЕК мөлшерінде ақшалай сыйақы алады. Ал алтын медаль иегерін дайындаған педагогке – базалық лауазымдық айлықақы 26,5 еселенген мөлшерінде; күміс медаль иегерін дайындаған педагогке – базалық лауазымдық айлықақы 17,5 еселенген мөлшерінде; қола медаль иегерін дайындаған педагогқа – базалық лауазымдық айлықақы 8,5 еселенген мөлшерінде беріледі.

Сонымен қатар, халықаралық олимпиадалардың жеңімпаздарына қазақстандық ЖОО-ның кез-келгеніне оқуға түсуге білім гранты беріледі.

Өткен жылы 23 оқушы 65,6 млн теңге, 20 педагог жалпы сомасы 71,4 млн теңге біржолғы сыйақы алған болатын. Жалпы 12 ірі халықаралық жарысқа қатысқан 1218 қазақстандық оқушының 603-і медаль иегері атанды. Яғни, әлемдік додаларда еліміздің намысын қорғаған әрбір екінші қатысушы жүлделі орынға ие болды.