30 мау, 2023 сағат 17:45

ҰБТ-2023: Ереже бұзған 273 талапкердің нәтижесі жойылды

Фото: elorda.info

Негізгі ҰБТ басталғалы түлектер жуықтап алғанда 267 мың рет тест тапсырған, деп хабарлайды "Ұлт ақпарат".

Оның ішінде талапкерлердің 76%-ы қазақ тілінде, 24%-ы орыс тілінде, 292 рет ағылшын тілінде тестілеуден өткен.

Ұлттық тестілеу орталығың мәліметінше, ҰБТ басталғалы шекті балды жалпы талапкердің 79%-ы жинаған. Орташа көрсеткішке келетін болсақ, ол 70 балды құрады. Төрт адам ең жоғары көрсеткіш көрсетіп, 137 балл жинады.

«ҰБТ-ның аяқталуына бірнеше күн қалды. Осы аптада біз грант тізімін жарияладық. Гранттардың басым бөлігі «Инженерлік, өңдеу, құрылыс салалары» білім беру бағдарлама топтарына бөлінді, олардың саны 18 744 грантты құрайды. Ал «Педагогикалық ғылымдарға» – 12 560 грант, «Ақпараттық-коммуникациялық технологиялар» саласына – 10 103 грант, «Жаратылыстану ғылымдары, математика және статистика» бағытына 7 388 грант тиесілі. Сондай-ақ, «Серпін» бағдарламасы арқылы түсушілерге 3 653 грант бөлінген. Жалпы, бакалавриатқа түсу үшін 2023-2024 оқу жылында 73 мыңға жуық грант бөлінді», - деп атап өтті ҚР ҒЖБМ Ұлттық тестілеу орталығының директоры Руслан Емелбаев.

Айта кетейік, ерекше білім беру қажеттіліктері бар оқуға түсушілер үшін қолайлы жағдай жасаудың арқасында алты аптаның ішінде олар 719 рет ҰБТ-ға қатысқан.

"Бүгінгі таңда 365 талапкер смартфон, шпаргалка және басқа да тыйым салынған заттарды алып өту әрекеті салдарынан тест тапсыру мүмкіндігінен айырылды. Тестілеу кезінде ережелерді бұзғаны үшін аудиториядан 273 адам шығарылып, олардың нәтижелері жойылды. Бөгде тұлғалар анықталған жоқ.

Айта кетсек, 2023 жылғы ҰБТ аяқталғаннан кейін күнтізбелік жылдың 31 қазанына дейін тестілеудің бейнежазбаларына талдау жүргізіледі. Тыйым салынған заттарды пайдалану немесе ережелерді бұзу фактілері анықталған жағдайда түсушінің ҰБТ нәтижелері жойылады" - делінген хабарламада.