Фото: ҚР СІМ баспасөз қызметі
Қазақстанның Сыртқы істер министрлігі 15 сәуірден бері қарулы қақтығыс басылмай жатқан Суданнан эвакуацияланған ел азаматтарының саны туралы мәлімдеді, - деп хабарлайды Tengrinews.kz сайты.
"Судандағы қарулы қақтығыстың күшеюіне байланысты Мысырдағы және Эфиопиядағы елшіліктеріміз, сондай-ақ Джиддадағы бас консулдық Қазақстан азаматтарын эвакуациялау мәселесімен айналысып жатыр.
Бастапқыда ол жақтағы Қазақстанның үш азаматы ғана белгілі болған. Кейін ақпарат БАҚ-та жарияланғаннан кейін Судан аумағындағы тағы 14 азаматымыз министрлікке жүгінді", - деді СІМ баспасөз хатшысы Айбек Смадияров.
Сыртқы істер министрлігінің хабарлауынша, Қазақстан елшіліктерінің есебіне сәйкес, қақтығыс өршігенге дейін Суданда барлығы 17 азаматымыз болған.
"Олардың көпшілігі Суданға жеке тау-кен компаниясында жұмыс істеу үшін келген. Бүгінде Суданда орналасқан Ресей, Түркияның Эфиопия, Иордания елшіліктерінің көмегімен, Қазақстанның алты азаматы эвакуацияланды", - деді ресми өкіл.
Смадияров азаматтардың Иордания, Сауд Арабиясы, Жидда және Эфиопияға жеткізілгенін атап өтті.
"ЮНИСЕФ қызметкері болып табылатын Қазақстанның бір азаматы Иорданиядағы ЮНИСЕФ кампусына орналастырылды, тағы бір отандасымыз өз өтініші бойынша Әмірліктерде қалуды ұйғарды. Төрт отандасымыз Қазақстанға келді. 17 азаматтың алтауы Суданнан тыс жерлерге кетті. Біздің қалған 11 азамат өз қалауы бойынша Суданда қалды. Оның 10-ы - тау-кен өндіруші жеке компанияның қызметкерлері. Бір азамат - "Шекарасыз дәрігерлер" ұйымының қызметкері. Ол сонда қалуды шешті, біз де онымен байланыстамыз", - деді Смадияров.
Сыртқы істер министрлігінің өкілі Суданда Қазақстанның елшілігі болмағандықтан, азаматтарды эвакуациялау шетелдік елшіліктердің көмегімен жүзеге асырылатынын атап өтті.
740 рет оқылды
