ҚР Ішкі істер министрлігі 16 жасқа дейінгі балалардың ата-аналарымен бірге шетелге шығу кезінде фотосуреттерін олардың төлқұжаттарына жапсыру талабын алып тастау үшін еліміздің заңнамаларына түзетулер енгізіп жатыр, деп хабарлайды "Ұлт ақпарат".
Министрлік мәліметінше, ата-аналардың төлқұжатына балалары туралы қолмен енгізілген жазбада биометриялық мәліметтер болмайды. Сол себептен шекарадан өту кезінде проблемалар туындап, кей жағдайда азаматтар кері қайтарылып жатады.
«Әлем бойынша құжаттық-визалық бақылаудан өткізу, жеке басты анықтау шаралары жетілдірілуде және биометриялық мәліметтері бар құжаттар (цифрлы фотосуреттер, саусақ таңбалары, көздің шатырша қабығының кескіні және т.б.) енгізілуде. Қазақстандықтар көп баратын елдерде (АҚШ, Ұлыбритания, БАӘ, Италия, Испания, Франция, Чехия, Словения, Хорватия, Греция, Венгрия, Польша, Германия, Швейцария, Швеция, Қытай, Оңтүстік Корея және басқалары) сол мемлекетке ата-аналарымен келген балалардың төлқұжаты болуы міндетті. Ал ата-ананың төлқұжатына балалардың фотосуреттерін жапсыру құжат ретінде мойындалмайды», - деп атап өтеді ведомстводан.
Ата-аналардың төлқұжатына фотосуреттерді жапсырудан бас тарту бірінші кезекте шетелде қиын жағдайда тап болуы мүмкін балаларды қорғауға және оларды шетелге заңсыз тасымалдау тәуекелдеріне байланысты болып отыр.
Балаларға төлқұжат тек шетелге шыққанда ғана қажет. Республика аумағында оның тууы туралы куәлікпен, үлкен азаматтар жеке куәлігімен расталады.
«Қазір жазғы демалыс жақындап келеді. Осыған байланысты ІІМ шетелге баруды жоспарлаған ата-аналарға басқа мемлекеттің шекарасынан еркін өту үшін өздерімен баратын балалардың төлқұжаттарын күні бұрын рәсімдеуге кеңес береді», - делінген министрлік ақпаратында.
2553 рет оқылды
