14 шіл, 2023 сағат 15:38

Щучинскіде баланы құтқарып алмақ болған мектеп мұғалімі суға батып кетті

Фото Sinegor.kz және Ақмола облысы ТЖД алынды

Щучинскіде 65 жастағы мұғалім суға батып бара жатқан баланы құтқару кезінде қаза тапты. Ақпаратты Ақмола облысы Төтенше жағдайлар департаментінің баспасөз қызметі растады, - деп хабарлайды Tengrinews.kz.

"Кеше Щучинск қаласында көлде батып бара жатқан баланы құтқару кезінде 1958 жылы туған ер адам суға кетті. Ер адам баланы құтқарып қалды. Бірақ өзін құтқара алмады", - деді ведомство өкілдері.

Құтқарушылар облыс тұрғындары мен қонақтардан суда қауіпсіздік ережелерін сақтап, балаларын қараусыз қалдырмауын сұрайды.

Ал Sinegor.kz порталының мәліметінше, қазап тапқан азамат алғашқы әскери дайындық пәнінің мұғалімі болған.

"2023 жылдың 12 шілдесінде баланың өмірін сақтап қалған, еңбек сіңірген ұстаз, өз ісінің кәсіби маманы Александр Иванович Руденко өмірден озды. Ол алғашқы әскери даярлық пәнінің мұғалімі, жанашыр және зейінді адам болды. Жоғары білімді, тәжірибелі моральдық-этикалық принциптерді ұстанған ол педагогикалық ұжымда да, оқушылар мен ата-аналар арасында да әрқашан құрмет пен сүйіспеншілікке ие болды. Бұл біздің заманымыздағы батылдық пен жауапкершіліктің сирек кездесетін үлгісі. Даңқты өлім деуге болады", - делінген хабарламада.