Ейскіде Су-34 әскери ұшағы құлап, 9 қабатты ғимарат өртенген апаттан қаза тапқандар саны 13 адамға жетті. Бұл туралы Ресей Денсаулық сақтау министрлігі хабарлады, - деп жазады Tengrinews.kz агенттігі.
"Ейск қаласындағы Төтенше жағдайлар министрлігінің құтқарушылары үйінділерді тазартқаннан кейін, ұшақ құлаған жерден қаза тапқандардың мәйіттерін тапты. 18 қазан сағат 06:00-дегі жағдай бойынша апат салдарынан 13 адам қаза тапты, оның ішінде - 3 бала. 19 адам түрлі дәрежедегі дене жарақатын алды, олардың төртеуі Краснодар облыстық ауруханасында емделіп жатыр, қалғандары Ейскіде емделеді. Зардап шеккендерге барлық қажетті медициналық және психологиялық көмек көрсетіледі", - деп хабарлады Денсаулық сақтау министрлігі.
Ресейдің Төтенше жағдайлар министрлігі үш адамның өлімі бірден белгілі болғанын, кейін үй қирандыларының астынан он адамның мәйіті табылғанын айтты.
"Ейскіде іздестіру-құтқару операциясы барысында 68 адам құтқарылды, оның ішінде баспалдақтардың көмегімен 360-тан аса адам эвакуацияланды", - деп түсіндірді департамент өкілі.
Еске салайық, Ресейдің Ейск қаласында әскери ұшақ көпқабатты тұрғын үйге құлаған болатын.
Ресей Қорғаныс министрлігі Су-34 ұшағы Оңтүстік әскери округінің аэродромынан оқу-жаттығу мақсатында көтерілген кезде құлағанын мәлімдеді.
720 рет оқылды
