Ішкі істер министрі Марат Ахметжанов әскерден жалтарған ресейліктерді еліне қайтаруға қатысты пікір білдірді, деп хабарлайды Sputnik Қазақстан.
Қазіргі кезде Қазақстан мен Ресей арасында қылмыскерлерді экстрадициялау, сотталған азаматтармен алмасу және құқықтық көмек бойынша келісімшарттар бар. Ішкі істер министрі Марат Ахметжановтың айтуынша, экстрадиция тек қылмыстық істер үшін ғана жасалады.
"Сосын адамға іздеу салынса, біз оны анықтап, Ресейге экстрадиция тәртібімен береміз. Бірақ қылмыстық әрекет болған жағдайда ғана экстрадиция жасалады. Бүгінде ондай шаралар Минск конвенциясы және құқықтық көмек аясында атқарылып жатыр", - деді Ахметжанов орталық коммуникациялар қызметінде өткен брифингте.
Оның айтуынша, әскерден қашқаны үшін қылмыстық іс қозғалмаса, экстрадиция жасалмайды.
"Мәселе мобилизацияда емес, мен тіркелген, санкция берілген және халықаралық іздеуге салынған қылмыстық құқық бұзушылықтар туралы айтып отырмын. Ал әскери комиссариат іздейтін болса, бұл адамды беруге құқықтық негіз бола алмайды", - деп атап өтті Ахметжанов.
Айта кетері, көрші елде ішінара мобилизация жарияланған сәттен бастап Қазақстанға 98 мыңға жуық ресейлік кірген. Ал шығып кеткен ресейліктердің саны 64 234 адамды құрап отыр. 21 қыркүйектен бері 8 мың резидент емес адам жеке сәйкестендіру нөмірін алған.
684 рет оқылды
