Фото: © Sputnik / Владислав Воднев
Ауа райының қолайсыздығына қарамастан, бүгін Астананың ботаникалық бағында елорданың медициналық жұртшылығы мен Дүниежүзілік денсаулық сақтау ұйымының өкілі қатысқан Дүниежүзілік денсаулық сақтау күніне арналған жүгіру шарасы өтті. Оған денсаулық сақтау министрі Ажар Ғиният қатысты, - деп хабарлайды Tengrinews.kz сайты.
Министр осыдан кейін бірден Мәжіліске "Кейбір заңнамалық актілерге денсаулық сақтау мәселелері бойынша өзгерістер мен толықтырулар енгізу туралы" заң жобасын таныстыру үшін барды. Бұл арада әлеуметтік желілерде жүгіруге қатысқан медицина факультетінің студенттері "ерікті-міндетті түрде" жіберіліп, таңғы сабақтар мен емтихандар ауыстырылғаны туралы ақпарат пайда болды.
Qumash Telegram-арнасы таратқан аудиожазбада ер адам студенттердің автобустармен Ботаникалық баққа бару жоспарын және жарысқа қатысушылардың алдағы әрекеттерін айтып береді. Сондай-ақ, іс-шараға қатыспағандарға жаза туралы ескертеді.
Бұл туралы тілшілер Ажар Ғинияттың өзінен сұрады.
"Бүгінгі марафон Денсаулық күніне орай болды. Денсаулық күні бүкіл ел бойынша басталды, ол бүкіл әлемде 7 сәуірде атап өтіледі. Сіздің мәлімдемеңізге келетін болсақ, мен хабардар емеспін. Біз бұл мәселені анықтаймыз", - деп уәде берді министр.
Университет студенттердің Астанадағы жаппай жүгіру шарасына қатысатынын растады. Білім ошағының баспасөз қызметі студенттердің мұндай шараларға үнемі қатысып тұратынын түсіндірді. Оқу орнының мәліметінше, бұл оқиғаға байланысты тергеу басталған.
"Мұндай іс-шаралар алдын ала ұйымдастырылып, өз еркімен қатысуға ниет білдірген студенттердің тізімі жасақталады. Ер адамның дауысы шыққан аудиохабарламаның таралуына қатысты тексеру басталды", - деп хабарлады университеттегілер.
548 рет оқылды
