ҚР Премьер-Министрінің орынбасары – сауда және интеграция министрі Бақыт Сұлтанов Ozon ресейлік маркетплейсінің басқарушы директоры Сергей Беляковпен кездесу өткізді, деп хабарлайды primeminister.kz сайты.
Тараптар Қазақстанда Ozon компаниясының дамуын, сондай-ақ өзара іс-қимылдың өзекті мәселелері — салық салу, электрондық құжат айналымы және тағы басқасын талқылады.
«Қазақстанда, бүкіл әлемдегі секілді, қазіргі таңда электрондық коммерция мен маркетплейстер, оның ішінде халықаралық алаңдар белсенді түрде дамып жатыр. Қазақстандық өндірушілер үшін бұл ел ішінде де, халықаралық нарықтарда да сауда көлемі мен өткізу географиясын ұлғайтудың тамаша мүмкіндігі», — деді Бақыт Сұлтанов.
Қазақстандағы Ozon компаниясының қызметі екі негізгі бағытта дамитын болады: логистикалық инфрақұрылым құру және қазақстандық кәсіпкерлерді маркетплейс платформасына шығару. 2021 жылғы желтоқсанда «QazTrade» АҚ мен Ozon арасында Ынтымақтастық туралы меморандумға қол қойылды.
Ozon басқарушы директоры Сергей Беляков компания өзінің логистикалық құрылымын республикада дамытуды жоспарлап отырғанын мәлімдеді.
«Ірі логистикалық нысанның ашылуы өңірден сатушылар санын орта есеппен 50% арттыруға мүмкіндік береді – олар тауарды сату алаңына тезірек әрі арзан бағада жеткізе алады, сондай-ақ тіпті елдің ең шалғай аудандарындағы сатып алушылар да өз тапсырыстарын тезірек ала алады», — деп атап өтті С. Беляков.
783 рет оқылды
