Соңғы бір тәулікте Қазақстанда ресейліктердің жеке сәйкестендіру нөмірін рәсімдеу көрсеткіші күрт артқан. Бұл туралы ҚР Цифрлық даму, инновациялар және аэроғарыш өнеркәсібі вице-министрі Әсет Тұрысов айтты, деп хабарлайды ҚазАқпарат.
«Қазіргі кезде елімізде резидент емес адамдарға ЖСН беру еңбек шарттарын бекітуге, көрсетілген қызметтер үшін қаражат алуға, әкімшілік жазаға тартуға, салық есептілігін жүргізуге, сондай-ақ түрлі банк операцияларын жүргізу үшін керек. Қазақстан Республикасында уақытша болатын шетелдіктер мен азаматтығы жоқ адамдарға ЖСН беру қызметі «Азаматтарға арналған үкімет» мемлекеттік корпорациясы арқылы көрсетілетінін атап өткім келеді. ЖСН 1 жұмыс күні ішінде дайындалады. Бейрезиденттің қолында паспорт болуы қажет, оның өкілі жүгінген жағдайда нотариалды куәландырылған сенімхат қажет», - деді Әсет Тұрысов Орталық коммуникациялар қызметінде.
Осы орайда ол соңғы күндері Қазақстанға келіп жатқан Ресей азаматтарының саны артқанын еске салды. РФ азаматтары бейрезидентке арналған ЖСН алу үшін жаппай ХҚКО-ға барып жатыр. Соның салдарынан ХҚКО-ларға жүктеменің артқаны байқалып отыр.
«Қазіргі уақытта ЖСН алу үшін келген ресейліктердің басым бөлігі Астана мен Алматыда және шекаралас қалаларда көп байқалған. Кеше ғана еліміз бойынша 13 мыңнан астам өтінім қабылданды. Осыған дейін шамамен мұндай көрсеткіштегі өтінімді бір ай бойы қабылдайтынбыз», - деді вице-министр.
Бұған дейін шетелдік азаматтарға қызмет көрсету үшін ЦДИАӨМ Астана мен Алматыда, сондай-ақ Қостанай, Батыс Қазақстан, Солтүстік Қазақстан, Павлодар, Ақтөбе және Ақмола облыстарында жекелеген ХҚКО-лар жұмысын күшейту туралы шешім қабылдағаны айтылған еді.
616 рет оқылды
