© Sputnik / Ксения Воронина
Ішкі істер министрі Марат Ахметжанов елімізде мастарды айықтыратын орындар өте аз екенін мәлімдеді, деп хабарлайды Sputnik Қазақстан.
Оның айтуынша, күнделікті өмірде қылмыстардың көбі мас күйде жасалады. Оларды оқшаулау мәселесі әлі шешілген жоқ.
"Еліміз бойынша 778 орынға арналған 35 уақытша бейімдеу және детоксикация орталығы жұмыс істейді. Бұл өте аз", - деді Ахметжанов Үкімет отырысында.
Мысалы, Өскеменде 20 төсек-орынға арналған бір ғана мекеме жұмыс істейді. Полицейлер жеткізген 7 мың құқықбұзушының 5 мыңы ғана орналастырылған. Сол сияқты Павлодарда 24 төсек-орны бар бір ғана мекеме бар. Ал Көкшетауда мүлде жоқ.
"Жалпы еліміз бойынша 594 орынға арналған тағы 32 мекеме қажет", - деді ол.
Айтуынша, мәжбүрлеп емдеуді қажет ететін созылмалы "маскүнемдер" үшін де төсек-орын тапшылығы бар. Еліміз бойынша бар-жоғы 20 ғана мамандандырылған наркологиялық мекеме жұмыс істейді. Бұл ретте, оларға азаматтарды жіберу процедурасы аса бюрократияға айналып кеткен.
"Ал, наркологиялық мекемелердің медицина қызметкерлері мен наркологтар тиісті шешім қабылдағысы келмейді. Нәтижесінде, полицейлер көбінесе бұл мәселемен тек өздері жүгіреді. Тіпті өзінің жеке қаражатын жұмсауға мәжбүр", деді министр.
684 рет оқылды
