ҚР ДСМ Санитарлық-эпидемиологиялық бақылау комитетінің төрағасы Айжан Есмағамбетова коронавирус штаммдарына қатысты түсінік берді, деп хабарлайды ҚазАқпарат.
Орталық коммуникациялар қызметіндегі баспасөз мәслихатында коронавирустың қандай штаммдары Қазақстанда анықталғаны сұралды.
«Қазақстанда таралған вирустың генотипін толық зерттеу мүмкіндігі бар. Пандемия басталғалы 285 штамм зерттелді, олар - наурыз айынан қаңтар айы аралығында бөлінген штаммдар. Сіздерді «мутацияланған оңтүстікафрикалық, британдық және жаңа бразилиялық штаммдары бөлінді ме» деген сұрақ мазалап тұрғаны белгілі. Маусым мен қаңтар аралығында генотиптеу нәтижесінде Қазақстан аумағында аталған штаммдар анықталмады», - деді А. Есмағамбетова.
Өз кезегінде ҚР Денсаулық сақтау вице-министрі Ажар Ғиният оңтүстікафрикалық, британдық және бразилиялық штаммдарды елге кіргізбеу үшін мемлекеттік шекарада тиісті шаралар қабылданғанын еске салды.
«Сол себепті елімізге сапарлап келіп жатқан азаматтар тиісті тексеруден өтіп жатыр. Барлық өңірде штаммдар тексеріліп отыр. Қазіргі кезде осы зертхананың жұмысы күшейтілді», - деді вице-министр.
831 рет оқылды
_80_80.jpg)
