Фото: who.int
Қазақстанда Дүниежүзілік денсаулық сақтау ұйымының (ДДСҰ) сайты прокурордың талабы бойынша бұғатталды. Бұл туралы Digital Paradigm директоры Елжан Қабышев мәлімдеді, - деп хабарлайды Tengrinews.kz агенттігі.
"Биыл 14 қазанда Талғар ауданы прокурорының талап арызы бойынша Алматы облысы Талғар аудандық соты өзіне қол жұмсау туралы ақпарат таратқаны үшін Дүниежүзілік денсаулық сақтау ұйымының (ДДСҰ) сайтын бұғаттау туралы шешім шығарды. Алайда олар хабарлама алмаған. Білмеймін, бұл менің ойымша, дұрыс емес", - деді Қабышев Алматыда өткен "Медиа Құрылтайда".
Дүниежүзілік денсаулық сақтау ұйымы сайтының Қазақстан аумағында ашылмағаны туралы Facebook-те басқа қазақстандық қолданушылар – денсаулық сақтау және медицина саласындағы сарапшылар да хабарлады.
Сот мұндай процесс шынымен болғанын растады. Оны Алматы облысы Талғар аудандық сотының судьясы Н.Б. Сәрсенбаев қараған. Талғар ауданының прокуроры мемлекет мүддесінде арызданған. Сот үкімі 2022 жылдың 14 қазанында шығарылды.
"Осы интернет-ресурстарда пайдаланушыларға өз-өзіне қол жұмсаудың егжей-тегжейлі әдістері, тәсілдері мен ұсыныстары айтылады. Интернеттің азаматтарға, оның ішінде кәмелетке толмаған балалар мен жастарға қолжетімділігін ескере отырып, бұл ақпарат қолайсыз әлеуметтік жағдайдың қалыптасуына қауіп төндіреді", - делінген сот құжатында.
Дәлелдеу бөлігінде сот шынымен де арызданушы көрсеткен интернет-ресурстарда "адамды өмірден айыру әдістері туралы ақпарат, сондай-ақ суицидтік көңіл күйді насихаттайтын ақпарат бар" делінген.
"Қазақстанда адам және оның өмірі ең жоғары құндылықтардың бірі ретінде танылатынын және интернет-ресурстарда адамды өмірден айыру, оны өз өмірінен қасақана айыруға итермелейтін әдістер туралы ақпарат бар екенін ескере отырып, прокурордың мәлімдемесі қанағаттандыруға жатады", - делінген сот қаулысында.
Шешімнің орындалуы Ақпарат және қоғамдық даму министрлігіне жүктелген.
Жоғарғы Сот мәлеметінше, шешімге ешкім шағымданбаған және ол заңды күшіне енген.
"Прокурор сайтты жабуды сұраған жоқ, тек суицид туралы жазбаны. Сайт туралы әңгіме болған жоқ. Сондықтан шешімнің қалай орындалғаны басқа мәселе", - деп қосты Жоғарғы Сот жанындағы Соттардың қызметін қамтамасыз ету департаменті басшысының орынбасары Елдос Жұмақсанов.
858 рет оқылды
