Қазақстан-Қытай шекарасындағы Достық станциясында жүк тиеу терминалы салынады, деп хабарлайды ҚазАқпарат.
Алматы облысының әкімі Қанат Бозымбаевтың сөзінше, экспорттық, сондай-ақ импорттық бағытта жүктерді ауыстырып тиеуге, сақтауға және қоймалауға бағытталған ауқымды жобаларды жүзеге асыру жоспарлануда. Мысалы, «DAR RAIL Infrastructure» компаниясының Достық станциясындағы құны 25 млрд теңге болатын, 150 жұмыс орнын құраты жүк тиеу терминалының құрылысын айтуға болады. Жоба Қазақстан-Қытай шекарасы арқылы өтетін жылына 9 млн.тоннаға дейін жүк пен 300 мың контейнерді тиеуді, сақтауды және қоймалау көзделген.
Минералдық шикізатты өндіру және қайта өңдеу саласына да баса назар аударылатын болады. Облыста уран-көмір кен орындарының бірегей қорлары, сондай-ақ марганец, вольфрам, алтынның бекітілген қорлары, пайдалы қазбалардың үлкен көлемді кен орындары бар.
«Дұрыс жұмыс жүргізе отырып, туризм саласын экономиканың толыққанды драйверіне айналдыруға болады. Алматы тау кластері, Алакөл және Балқаш жағалауларын, ұлттық табиғи саябақтардағы экологиялық туризмді дамыту басымдылыққа ие салалар болып табылады. Алматы тау кластері аясында жалпы сомасы 546,7 млрд.теңгеге 8 жобаны жүзеге асыру және 6 мыңнан астам жұмыс орнын құру жоспарлануда. 2025 жылға қарай жалпы өңірлік өнімдегі туризмнің үлесі 6% - ға дейін артады», - деді Алматы облысының әкімі Қанат Бозымбаев.
Жалпы облыстың 2025 жылға дейінгі инвестициялық портфелі құрылып, оған 19 мың адамға жұмыс беретін жалпы құны 2,8 трлн теңге болатын 289 жоба енгізілді.
766 рет оқылды
