Ресей әскері Украинаға басып кіргелі бері шамамен 20 мыңға жуық адамынан айырылған. Бұл туралы өз дереккөзіне сүйенген британдық Guardian басылымы хабарлады.
Бұған дейінгі есеп бойынша, мамыр айының екінші жартысында қаза болғандар саны 15 мың болған. Ресей әскері әсіресе Украинаның Луганск облысының батысындағы шабуылдарда көп шығынға ұшыраған.
Ал Украинаның есебінше, қаза болған ресейліктер саны - 31 мың адам. Украинаның өз шығыны нақты қанша адам екені белгісіз.
Украина қорғаныс министрлігіне сілтеме жасаған УНИАН агенттігінің хабарлауынша, елде күнделікті 100-ге жуық жауынгер көз жұмып, 500-ге жуығы түрлі жарақат алады. Бұл ақпараттарды соғыс жағдайында тексеру мүмкін болмай отыр.
The Guardian басылымына сұхбат берген дереккөздің атап өтуінше, көп ұзамай екі жақтың да әскері физикалық және психологиялық тұрғыдан болдыруы мүмкін. Ресейдің әскери резерві артық болғанымен, украин сарбаздарының әскери рухы мықты.
БҰҰ адам құқығы туралы жоғарғы комиссарының есебінше, Ресей Украинаға соғыс ашқалы бері 4302 бейбіт тұрғын мерт болған. Оның 272-і - бала. 5217 адам жараланған.
Адамдар көбіне ауыр артиллерия соққысынан қаза тауып, жараланған.
989 рет оқылды
