13 мау, 2023 сағат 17:55

Берлиндегі Мұстафа Шоқайдың зираты бұзылмайды – СІМ жауабы

көрнекі фото: abdulvahapkara.com

Германиядағы Мұстафа Шоқайдың зираты бұзылмайды. Бұл туралы Сыртқы істер министрлігінің ресми өкілі Айбек Смадияров айтты, деп хабарлады Halyq Uni.

Смадияров Германиядағы елшілік қызметкері әлеуметтік желіде тараған ақпаратты тексергенін атап өтті.

"Біздің елшіліктің (Қазақстанның Германиядағы елшілігі) қызметкері сонда барып, зираттың қызметкерлерімен сөйлесті. Ол фото, видеоға түсіріп, жағдайды өз көзімен көрді. Мұстафа Шоқайдың зираты орнында. Ол ешқайда көшірілмейді. Егерде бір жағдай болса, Германия тарапы бізге ескертеді. Сондықтан мұндай өтірік ақпаратты таратуды тоқтату керек", - деп жауап берді.

Түркияда тұратын тарихшы ғалым, шоқайтанушы, Мимар Синан көркемөнер университетiнiң профессоры Әбдуақап Қара да аталған ақпаратты жоққа шығарды.

Айта кетейік, қазақтың біртуар мемлекет қайраткері Мұстафа Шоқай 1941 жылы 27 желтоқсан күні Берлинде қайтыс болған. Марқұмның жұбайы Мария Горина түркі әлемінің тарихи тұлғасына айналған Мұстафа Шоқайдың денесін Берлиндегі түрік зиратына жерлеуге мұрындық болды.