Фото: Sebastian Gollnow / DPA / ТАСС
Басқа қалаларда тұратын ата-анасынан айырылған студенттердің жатақханада тұру шығыстары өтеледі, деп хабарлайды "Ұлт ақпарат" primeminister.kz сайтына сілтеме жасап.
"Мемлекет басшысы Қ. Тоқаев 2022 жылғы 1 қыркүйектегі «Әділетті мемлекет. Біртұтас ұлт. Берекелі қоғам» Жолдауында Үкіметке «...студенттердің жекелеген әлеуметтік тұрғыдан аз қамтылған санаттары үшін жатақханада тұру шығыстарын субсидиялау мүмкіндігін пысықтауды» тапсырды. Жаңа оқу жылы қарсаңында Президент тапсырмаларын орындау аясында Үкімет тиісті қаулы қабылдады" - делінген хабарламада.
Атап айтқанда, «Әлеуметтік көмек көрсетілетін азаматтарға әлеуметтік көмек беру қағидаларына» өзгерістер мен толықтырулар енгізілген. Оған сәйкес азаматтардың жекелеген санаттары үшін еліміздің колледждері мен жоғары оқу орындарында білім алу кезінде жатақханада тұру шығыстары үшін өтемақы төлеу көзделген.
"Өтемақыны жетімдер мен ата-ана қамқорлығынсыз қалған балалар, сондай-ақ мүгедектігі бар адамдар алады. Жатақханаларда тұру шығыстары үшін өтемақы сомасы жылына 29 айлық есептік көрсеткішті құрайтын болады.
Биыл барлығы 7 145 адам өтемақы алады. Олардың ішінде 4 651 жетімдер және ата-ана қамқорлығынсыз қалған студенттер, 2 494 мүгедектігі бар, бала кезінен мүгедек адамдар, мүгедектігі бар балалар бар.
Тиісті шығындар 2023 жылға бекітілген республикалық бюджет, сондай-ақ 2024-2026 жылдарға арналған бюджет лимиті аясында қаралады" - делінген Үкімет баспасөз қызметінің хабарламасында.
Өтемақы осы жылдың қыркүйегінен бастап беріледі.
564 рет оқылды
_140_110.webp)
