Фото: Азаттық радиосы
Жаңаөзеннен тұрақты жұмыс талап етіп келіп, Астанадағы Энергетика министрлігі ғимаратының алдында наразылық білдіріп тұрған мұнайшыларды 11 сәуірде кешкісін полиция мен арнайы жасақ күштеп ұстап әкетті. Бұл туралы Қазақстандағы адам құқығы бюросының Астанадағы өкілі Артур Алхастов айтты. Наразыларды ұстау сәтінен Власть интернет-журналының Telegram-арнасы видео жариялады, деп хабарлайды Азаттық радиосы.
Алхастовтың Азаттыққа айтуынша, мұнайшыларға алдымен қала әкімдігінің өкілдері келіп, наразылық шарасы заңсыз екенін ескертіп, тарауды талап еткен. Ал жұмысшылар барар жеріміз жоқ деген. Біраз уақыттан соң арнайы жасақ пен полиция келіп, Энергетика министрлігі алдындағы наразылардың бәрін ұстап әкеткен.
Власть сайты таратқан видеода наразылар арнайы жасаққа қарсыласқаны көрінеді.
Кеше, 10 сәуірде Маңғыстау облысынан 80-нен астам адам Астанаға мұнай компаниясынан жұмыс талап етіп келген. Олар Энергетика министрлігі кеңсесінің алдында түнеп шыққан. Жаңаөзендіктерге министрліктен ешкім шықпаған.
Наразылар "ҚазМұнайгаз" бен "Өзенмұнайгазға" қызмет көрсететін "БерӘлі Маңғыстау Company" кәсіпорнында жұмыс істеген. Таяуда олар жұмыстан қысқарып қалған. Себебі "ҚазМұнайГаз" ұйымдастырған тендерде "БерӘлі Маңғыстау Company" жеңіліп, "Кезби" және Ai-Bis компаниялары жеңген.
"ҚазМұнайГаз" компаниясы наразыларға жалақыларын сақтай отырып, "Кезби" және Ai-Bis компанияларынан жұмыс ұсынған. Алайда наразылар бұл ұсынысқа келіспей, "тоғыз айдан соң тағы тендер өтіп, тағы да жұмыссыз қаламыз, бізге тұрақты жұмыс керек" деген еді.
11 сәуірде кешкісін Мәжіліс депутаттары Ермұрат Бәпи, Мақсат Толықбай және Ринат Зайытов министрлік алдындағы наразыларға барған. Наразылардың бірі депутаттарға "Жаңаөзенге келіп, ауылды аралаңдар, шіріп жатыр" деп жағдайлары нашар екенін айтқан. Ал Зайытов наразыларға "мәселе кабинетте шешіледі, бірақ бұл жерде тұрғаны процесті жылдамдатады" деген.
Ескерту: видеолар Власть интернет-журналының Telegram-арнасынан алынды
758 рет оқылды
