Астанада заңсыз митинг ұйымдастырушы 15 тәулікке қамауға алынды, - деп жазады Massaget.kz порталы.
Елордалық соттың баспасөз қызметі М.Ж. Әбиевке қатысты әкімшілік құқық бұзушылық туралы істің қаралуы туралы хабарлады.
Ресми деректерге сәйкес, 27 қарашада Астана қаласының әкімшілік құқық бұзушылық істер жөніндегі мамандандырылған ауданаралық соты Әбиевке қатысты екі істі қараған.
Оған қатысты екі әкімшілік құқық бұзушылық туралы хаттама толтырылды: бейбіт жинындарды ұйымдастыру және өткізу тәртібі туралы заңнамада белгіленген тәртіпті бұза отырып, рұқсат етілмеген митинг ұйымдастырғаны және өткізгені үшін (ӘҚБтК 488-бабы 7-бөлігі) және полиция қызметкерлерінің қызметтік міндеттерін атқаруына байланысты олардың заңды талаптарына бағынбағаны үшін (ӘҚБтК 667-бабы 1-бөлігі).
"Іс материалдарында 2022 жылдың 26 қарашасында М.Әбиев Астана қаласының жергілікті атқарушы органының рұқсатынсыз Қорғалжын тасжолы бойында митинг ұйымдастырып, полиция қызметкерлерінің заңды талаптарына бағынбағаны көрсетілген.
Оның сотта айтқаны бойынша, ол ауыл шаруашылығын дамыту жобасын тез арада қарауға ел басшылығы назарын аудару мақсатында бейбіт митинг ұйымдастыруды ұйғарған. Ол заңға қайшы әрекет жасамағанын айтып, бейбіт жиын өтетін күннен бір күн бұрын қала әкіміне алдағы іс-шара туралы хабарлағанын мәлімдеді. Әкімшілік құқықты бұзу бойынша кінәсін мойындамады. Прокурор соттан Әбиевті кінәлі деп танып, 15 тәулікке қамауға алуды сұрады", - деді Астана сотының баспасөз қызметі өкілдері.
Бірінші факт бойынша сотта Әбиевтің жергілікті атқарушы органға хабарлама бермегені анықталды.
"Осылайша, Әбиевтің бейбіт жиындарды ұйымдастыру мен өткізудің белгіленген тәртібін бұзғаны анықталды. Екінші факт бойынша видеодан Әбиев полиция қызметкерлерінің тәртіпті сақтау туралы бірнеше рет қойған талабына жауап бермей, рұқсат етілмеген шеруге қатысуды тоқтатудан бас тартқаны көрінеді.
Сотта Әбиевтің кінәсі әкімшілік құқық бұзушылық туралы хаттамадағы нақты мәліметтермен, бейнежазбамен және істің басқа да материалдарымен анықталды. ӘҚБтК-нің 488-бабы 7-бөлігінің санкциясында 15 АЕК мөлшерінде айыппұл салу немесе 15 тәулікке дейін әкімшілік қамаққа алу түріндегі жауапкершілік көзделген. ӘҚБтК-нің 667-бабы 1-бөлігінің санкциясы - 30 АЕК мөлшерінде айыппұл немесе 15 тәулікке дейінгі мерзімге айыппұл салу", - деді елордалық соттың баспасөз қызметі өкілдері.
Астана қаласының Әкімшілік құқық бұзушылық істер жөніндегі мамандандырылған ауданаралық соты Әбиевті осы құқықбұзушылықтарды жасағаны үшін кінәлі деп танып, екі хаттама бойынша да 15 тәулікке әкімшілік қамаққа алу түріндегі әкімшілік жаза тағайындады. Қаулылар заңды күшіне енген жоқ.
816 рет оқылды
