04 шіл, 2023 сағат 09:27

Әскери бөлімнен қашып кеткен Дәулет Тұрлыхановтың ұлы табылды

Фото: © Sputnik / Виталий Аньков

Мәжіліс депутаты, спорт ардагері Дәулет Тұрлыхановтың әскери бөлімнен қашып кеткен ұлы табылды. Бұл туралы қорғаныс министрлігінің баспасөз қызметі хабарлады.

"3 шілдеде Ішкі істер органдарының қызметкерлері және әскери полицияның әскери қызметшілерімен ұйымдастырылған бірлескен жедел-іздестіру іс-шаралары барысында әскери бөлімді өз еркімен тастап кеткен мерзімді қызметтегі қатардағы жауынгер Б.-ның орналасқан жері анықталды.

Әскери қызметші қызмет атқаратын орнына жеткізілді. Аталған факт бойынша қызметтік тексеріс жүргізіліп жатыр", - делінген хабарламада.

Естеріңізге сала кетейік, Қонаев гарнизонының әскери бөлімдерінің бірінде қатардағы жауынгер Б. қамауға алу мерзімі аяқталғаннан кейін әскери бөлімнің орналасқан жеріне қайтып бара жатқан кезінде белгісіз бағытқа қашып кеткен.

Ол бұйрыққа бағынбай, оны орындамағаны үшін гауптвахтада ұстау түрінде әкімшілік жауапқа тартылған болатын. Әскери бөлімнің орналасқан жеріне әскери қызметшінің сүйемелдеуімен қайтып бара жатқан.