Қазақстанның агроөнеркәсіптік кешенінде мониторинг, талдау және болжау бойынша бірыңғай цифрлық ситуациялық орталық құрылады. Бұл жайлы Парламент Мәжілісінде аграрлық ғылымды, білім және өндірісті интеграциялау мәселелері бойынша отырыста Ұлттық аграрлық ғылыми білім беру орталығының басқарма төрағасы Төлеутай Рақымбеков мәлім етті, деп хабарлайды ҚазАқпарат.
«Қазақстанның агроөнеркәсіптік кешенінде мониторинг, талдау және болжау бойынша бірыңғай цифрлық ситуациялық орталық құру мәселесін пысықтап жатырмыз. Ол біздің орталықтың базасында ашылып, ауыл шаруашылығы саласының барлық ақпараттық жүйесін интеграциялауды көздейді», - деді Төлеутай Рақымбеков.
Ұлттық аграрлық ғылыми білім беру орталығының басшысы өкінішке орай Қазақстан әлі күнге дейін АҚШ ауыл шаруашылығы министрлігінің болжамды мәліметтерін пайдаланатынын жеткізді. Оның айтуынша, цифрландыру саласындағы мамандар мен қарапайым шаруа қожалық иелерін кездестіріп, фермерлердің бұл бағыттағы тәжірибесін арттыру керек.
«Цифрландыру саласының артықшылықтары шаруа иелерін артық шығындардан арылуға көмектесер еді», - деді ол.
Айта кетсек, бұған дейін Төлеутай Рақымбеков отандық аграрлық ғылымның басты проблемаларын атаған болатын. Оның айтуынша, біздегі аграрлық ғылымның басты мәселесі – білім беру, трансферт пен коммерциялық технологияларды ұсыну бойынша ұйымдастыру жұмысының әлсіздігі болып отыр.
1134 рет оқылды
_80_80.jpg)