26 қыр, 2023 сағат 15:10

21 жасқа толмағандарға энергетикалық сусын сатуға тыйым салынуы мүмкін

Фото: KamranAydinov/Freepik

Денсаулық сақтау министрі Ажар Ғиният 21 жасқа дейінгі азаматтарға энергетикалық сусын сатуға тыйым салынуы мүмкін екенін айтты, - деп хабарлайды Massaget.kz порталы.

Министр бұл балалардың денсаулығына әсер ететінін жеткізді.

"Қазіргі таңда Мәжілісте денсаулық сақтау саласына байланысты заң қаралып жатыр. Сол заңның шеңберінде 21 жасқа дейінгі азаматтарға, балаларға энергетикалық сусын сатпау туралы норма қарастырылып жатыр. Денсаулық сақтау министрлігі тарапынан бұл норманы қолдап отырмыз. Өйткені бұл балалар мен жастардың денсаулығына тікелей байланысты дүние", - деді министр.

Министрлік өкілдері мұндай сусындарға неге біржола тыйым салынбайтынын түсіндірді.

"Шектеп, ішнара ішетін болса, энергетикалық сусындардың денсаулыққа зияны жоқ. Бірақ балалардың 9 пайыздан астамы әртүрлі тәтті сусындарды күнде ішеді екен. Бұл семіздікке, қант диабеті, жүрек қан тамырлары ауруларына әкеп соғады. Балалар мөлшерін білмей, өз денсаулығына жауап бере алмайды. Ал ересек азаматтар өз денсаулығына өзі жауап беруі керек. Сондықтан жаппай тыйым салу дұрыс емес деп санаймын", - деді Ажар Ғиният.

Әлеуметтік желіде адамдардың Gorilla сусынын ішіп, ауыр науқасқа шалдыққаны туралы видеолар жиі тарайды.

Журналистің "Бұл ақпаратқа сенуге бола ма?" деген сұрағына министр нақты жауап бермеді.